شەفەق نیوز/ هەرچەن کوردە یل فه‌یلی کەفتنە وەر ئەو ستەم و جەورەیلە لەبان دەس رژیم وەرین ک بویە زەخمەیل قویلیگ لە دەروین و گیانەیل، و گوماکردن خاک و دارایی و پایەی کۆمەڵایەتی و بازرگانیان ک داشتنەی، بەڵکم ئەوە ریگری نەوی ک بوودە هاندانیگ ئەرا فرە لە کوڕ و دوێەتەیلیان تا ریەیل خوەیان لەبان سەختیەگانیش بووەنە سەر، تا لەلیان سیاسی و زانا و پزشک و چالاکوان مەدەنی دەرچگ.
و لەناو ژنەیل کورد فەیلی، خانم سەبیحە ئەڵماسە ک خوازێد لەی چەوپیکەفتنە رووشنایی بخەێدە بان لایەلیگ لە مێژوو خەبات چین کورد فەیلی وەشیوەیگ گشتی، و ئەو رەنجەیلە ک کۆمەڵەی کوردە فەیلیەگان دەێدەی، ک خوەی لە سوید سەرپەرشتیاریی کەێد.
شەفەق نیوز- لە سەره‌تا خوازیمن سەبیحە ئەڵماس زیاتر بناسیمن.. ئایا توێنین وەشیوەیگ فراوانتر کار و چالاکیەیل کۆمەڵەی ژن فەیلی ک خوەدان سەرپەرشتیاریی کەین نشانمان بیەین؟
• من سەبیحە ئەڵماسم، کورد فەیلیم لە ساڵ ١٩٨٨ لە سوید نیشته‌جا بویمە، و خوازم نشان بیەم ک هووکار هاتنمان ئه‌ڕا ئێره ، لەوەر ئەو ستەم نەتەوەیی سیاسیە بوی ک ئیمەی فەیلی لە عراق کەفتیمنە وەری، وەتایبەت لە سەردەم دیکتاتۆر سەدام حسێن و رژیم شوونبڕیاگ بەعس.
من چالاکوانیکم لە باوه‌ت ماف ئنسان و هەمیش لە باوەتە گرنگەگان ژن، و هەمیش رکدارم لە بڵاوکردن و هووشیارکردن مەردم وە باوەت ئیمەی کورد فەیلی لە هەر شوونیگ، لە بۆنەیلیگ ناودەوڵەتی لە كونگرەیل ژنانە بەشداری کردمه ک باس لە باوەتە گرنگەگان ژن لە سوید و جهان کەن.
کۆمەڵەی ژن کورد فەیلی لە ساڵ ٢٠٠٣ دامەزرانیمن، و ئیسە وەرپرسایەتیی کەم، و چالاکیەیلیگ ئه‌ڕا هووشیاری دیموکراتی و رووشنهویری داشتیمن، و پەیوەندیەیل خاسیگ وەگەرد رێکخراوەیل کۆمەڵگای مەدەنی لە سوید و دەیشتی دروس کردیمن.
ئیسە من داڵگ چوار مناڵم و ١٣ کوڕەرزا دیرم، بەشیگ لەلیان رەسینە قۆناغەیلیگ پێشکەفتگ لە زانکۆ ئەرا خوەنستن ماستەر و دکتۆرا، و گرنگی لە باوەت نەتەوەییه‌كان وپێكهاته‌ی فەیلییه‌كان لەلای مێژوو و کەلتوور گوزەیشتە و ئیسە دیرن.
كومەڵەی ژن کورد فەیلی هالە شار یتبوری ، و لە ئامانجەگانی هووشیارکردن ژنەیل وگواستنەوەی مێژوو و زانیاریەیل لە کەلتورەگەی ئەرا نەوەیل هاتگ وەتایبەت کوردەیل فەیلی لە دەیشت عراق.
لە گرنگترین ئەو ئامانجەیل کۆمەڵەگە خوەی کار ئەرا ئاسانکردن تیکڵابوین وەگەرد کۆمەڵگای سویدی، و هەمیش ئەنجامدان کارەیل هووکارەکردن پیشەیی جوور دویرانن و ئاشکردن و تەندروسی و باوەتەیلیگ رووشنهویری و بوونه‌یل دڵخوەشی جوور ئاهەنگ و گەشت وگوزار ئەرا ئەندامەیل کۆمەڵەگە و برادەرەیلیان لە سویدیەیل و باقی نەتەوەیل تر لەوانەگ وەگەردمان دڵسووزن.
کومەڵەگە جیوازە وە پەیوەندیەیل خاسیگ وەگەرد لایەنە فەرمیە سویدیەگان و هەمیش رێکخراوەیل کۆمەڵگای مەدەنی لە سوید.
کۆمەڵەگەمان ئەندامە لە دەسەی هەماهەنگی ئەرا رێکخراوە کوردەیه‌كان لە یتبوری و ئەندامە لە دەسەی وەرگریکردن لە مافەیل کوردە فەیلیەكان لە شار یتبوری و دەورگردی.
گشت ساڵیگ کۆمەڵەگە یاد قوربانیەیل فه‌یلی ، ئه‌و گەنجەیل ك وەدەس رژیم تاوانکارشه‌هید كریان ، ئه‌كا.
لە چین پەیوەندیەگانمان لە دەیشت سوید، چەن سەردانیگ ئەرا هەرێم کوردستان کردیمن، و توێنستیمن پەیوەندیەیل خاسیگ وەگەرد رێکخراوەیل کۆمەڵگه‌ی مەدەنی بکەیمن، وهەمیش وە هاوکاری رێکخراوەیل سویدی توێنستیمن میوانی شاندەیل رێکخراوە دیموکراتیەگان بکەیمن، و خولەیلیگ ڕاهێنان لەباوەت دیموکراسی و ماف مرۆڤ لە سوید واز بکەیمن.
شەفەق نیوز- قسە هەس ک گوایە شار یتبوری ک کۆمەڵەگە هاناوی یەکیگە لە گەوراترین ئەو ناوچەیلە ک کوردەیل فەیلی هانە ناوی، ئایا ئەوە کاریگەری لەبان کەلتوور و شیوەی شارە ئۆڕوپایی باکووریەگە داشتگە؟
• وەداخەو ، هیچ دەوریگ ئەرا کوردە فەیلیەگان لە کۆمەڵگای سویدی نییە، ئەوەیش چوودەو ئەرا کەم بەشداربوین لە باوەتەیل کۆمەڵگای سویدی، وفرە جار کۆمەڵەگە تەقەلای ئاڵشتکردن ئەوە دا، وەلی وەداخەو ک وەشیوەیگ ئاشکرا سەرنەکەفتیمن.
شەفەق نیوز- چەوکەفتنەیلیگ وەگەرد شاژن سوید داشتین، هەڵوێستی له باوەت کورد فەیلی چوین بوی.
•وەگەرد کۆمەڵەیل کۆمەڵگای مەدەنی سەردانیگ ئەرا شاژن سوید ئەنجام دایمن، لە رووژیگ مێژوویی ک خوەی رووژ جهانی ژن لە هەیشت ئادار بوی، و کۆمەڵەگان وکارەیلیان و تیکڵاوبوینیان لەناو کۆمەڵگای سوید ناسێد، ومن خوەم وە کوردیگ فەیلی لەناو شاندەگە ناسانم.
شەفەق نیوز- فەیلیەگان لە ئاوارەیی چوین نووڕنە رەوشەیل کورد فەیلی لەناو عراق، ئایا ئیوە بەشدارییگ لەی باوەتە داشتینە؟
•لەچین کۆمەڵەگە هیچ چالاکییگ لە پاڵپشتی کورد فەیلی لەناو عراق نەکردیمنە، بەڵکم لە ئاست کەسایەتی خوەم جوور ژنیگ کورد فەیلی هەڵمەت ئەرا گردەوکردن هاوکاری ئەرا دروسکردن پەیکەر شەهید کورد فەیلی لە بەغداد کردم، و هاوکاری ئەرا دەسمیەتی ئاوارەگان لە عراق کردیمن.
شەفەق نیوز- هەمیشە گلەیی خریەێدە بان کوردە فەیلیەگان لەدەیشت تا قسە وەزوان داڵگی خوەیان بکەن، ئایا کۆمەڵەگەی ئیوە چ بەشدارییگ لەی باوەتە کردگە؟
• کۆمەڵەگە تەقەلایلیگ ئەرا ئەنجامدان خولەیلیگ زوانەوانی داشتگە ئەرا دەسمەیتداین لە گەشەپێدان و قسەکەردن وە زوان کوردی فەیلی وەتایبەت ئەرا مناڵەیل، وەلی وەداخەو وەبی هیچ ئەنجامیگ.
خوەشم تیەێد لەڕی ئاژانس شەفەق نیوز رووشنایی بخەمە بان ئی خاڵ گرنگە دەربارەی گرفت کوردە فەیلیەكان، ک سەرکردەیگ و سەرکردایەتی نیشتمانییگ نەیرێد سەروە هیچ لایەنیگ نەوود، کار ئەرا چەسپانن مافەیل ئی چین ستەمدیدە بکەێد، لە دەستورەیل ئەو دەوڵەتەیلە ک هانە ناویان، و لە بۆنە ناودەوڵەتیەگان، وهەمیش بایەدە گلەیی لەبان خوەمان بکەیمن جوور کورد فەیلی ک خوەمان واز لە باوەت ئازادیمان وهاوردنەوەی سەروەری خوەمان و چەسپانن مافەیلیمان هاوردیمن، و وەداخەو ک فرە لە کوردەیل فەیلی باوەتە مەزهەبیەگان ئەوبان نەتەوەیەگە پەسەن کەن، و وەیەوە شناسنامەی خوەمان لەدەس دایمن.