شه‌فه‌ق نیوز- نه‌عیم نه‌جه‌فی، چالاک کرماشانی، ویدئۆوێ دا وه ده‌ر ک ده نامێ بڕێ له مه‌لاگه‌یله وه لایینداری له داعش و بوخت کردن ئه‌ڶه هونه‌رمه‌نده‌یل و چالاکه‌یل کورد، بوختانبار کردگه.
ئه‌و ده ئی ویدئۆوه له دو که‌س، مه‌ڵا حه‌مید فه‌ره‌جی ک ده سه‌پیه‌ڵ‌زه‌هاو مه‌لایه‌تی و پێشنمازی دکه‌ێ و مه‌لا ستار ویسی ده جوانڕوو، نام بردگه.
ئه‌و وتگه ک فه‌ره‌جی چه‌ن وه‌خت پێش وتگه ک هووز قه‌ڵخانی و یارسان کافره‌ن هه‌رچه‌ن وه لاده‌مێگه‌و چه‌نێ تر دۆمای ئه‌وه قسه‌گه‌ی خوه‌ێ لڕانگه‌سه‌و و چوون‌چشتێ عوزرخوازی کردگه.
نه‌عیم وه‌یجووره وتگه ک مه‌لا ستاریش ک (حوسه‌ین سه‌فامه‌نش)، گوورانی‌چڕ نامدار و خه‌یرخواز کرماشانی، کفرچییه ئوو وه لابه‌یتێ له شێعره‌یلێ ک سه‌فامه‌نش خوه‌نییه‌سه‌ی ک یه‌کجوور ئارایه‌ی ئه‌ده‌بی ها له تێیا، هشاره داگه و وتگه یه کفره ک نه‌عیمیش وه شوون قسه‌یله‌ێ خوه‌ێ ده وه‌ر ئه‌و وه‌ر ئی ملا، وتگه: ئی مه‌لا یا هیچ‌مه‌زان و زانا نییه یا خوه‌ێ کردگه‌سه یام و مه‌زان به‌شکه‌م وه‌ێ بوونه‌وه سه‌فامه‌نش له چه‌م وڵات بخرێ.
نه‌عیم وتگه بڕێ ده کرماشان و ئیلام، لاییندار داعشن و بایه‌د نوای کار و بار ئاشکارا و پیه‌نامه‌یله‌یان بگرن، دوفێشتر تواێ نوای ئایم کیشانێیان وه‌راو سه‌له‌فییه‌یله بگیردرێ.
نه‌جه‌فی ده دریژای قسه‌یله‌ێ خوه‌ێ وت: م دویشم ئه‌یانه ئایم داعش و ته‌کفیرییه‌یل و بایه‌د ده‌وڵه‌ت ئێران نوایان بگرن وه ده‌سپێچ م ئه‌ڕا راسی قسه‌گه‌م یه‌سه ک ئه‌و کابرایله تا ئێسه ئه‌ڕا دروویش بییه حه‌تتا یه‌کجاریش نام داعش و ته‌کفیرییه‌یل تر وه گه‌ن نه‌هاوردنه و ئه‌ر م دروو دده‌م، ئه‌وان بیان وه ده‌نگ به‌رزه‌و هه له‌و تریبوونه‌یله ک ها ده ده‌سێیان و ئازادانه گشت چشتێ دکه‌نه مل هونه‌رمه‌نده‌یل و چالاکه‌یل کوردایه‌تی، بانگه‌وازی وڵات بکه‌ن ک بایه‌د ده نوای داعش و ته‌کفیرییه‌یله بوسن و له گه‌نی ئه‌وانه بویشن ک ئه‌ر له‌ێ‌وا بکه‌ن که‌سه‌یلێ جوور منیش دچیمنه پێشت سه‌رێیان نوێژ دکه‌یمن.
ئه‌وی ده دۆماقسه‌یله‌ی وتگه ئی ئایمه‌یله ک هه‌ڕه‌شه وه چالاکه‌یل کورد دکه‌ن وه نام مه‌زهه‌ب، ده‌س‌نیشان کرد داعش و ئه‌ڵقاعده‌ن و بایه‌د بزانن ک گشت خه‌ڵک کرماشان، چ شیعه و چ سونی و چ یارسان و چ هووز ئه‌هڵ هه‌ق و گشت ئێڵ و هووزه‌یل کرماشانی وه هه‌ر دین و باوه‌ڕ و بنزار و زاراوه‌یلێ ک دیرن و یه، ساڵان ساڵه وه خوه‌شی و برایه‌تی و دووسایه‌تی و ژن‌و‌ژنخواز و هامشوو دیرن وه‌گه‌رد یه‌کتره‌کی، گووش له ئه‌وان نه‌دته‌کنن و ده نوایان دوسن و ئه‌یانه خاسه بزانن ک له یه‌ولا ئیمه هه‌رچێ وه شاریاگ دکه‌ن دخه‌یمنه ده‌ر و ده وه‌ر ئه‌و وه‌رێیان دوسیمن تا بویشیمن ئیلام و کرماشان مه‌یان یارگیری داعش و ته‌کفیری و تروریسته‌یله نییه و کرماشانیش مووسڵ نییه ک بشێوننه‌ی و وڵات بکه‌ن وه ده‌یه‌ک‌بڕش.
خاسه بزانن ک تا ئێسه نه ئه‌و مه‌لایله خوه‌یان و نه که‌سێ تر ئی قسه‌یل نه‌جه‌فییه وه دروو نه‌‌زانستگه، باوجی دۆمای قسه‌یله‌ی ئه‌و ده بڕێ له شه‌واچه‌یل مه‌جازی وه‌یجووره‌یش وتریاگه ک داعش، بیین خوه‌ێ ده کرماشان وه راس زانستگه.