شه‌فه‌ق نيوز/ هه‌ناى ك جه‌نگ جه‌هانى دويه‌م تونه‌و بوێد و ئه‌ڵمانياى نازييش ته‌نگ وه بريتانيا هه‌ڵچنياد، چه‌رچڵ سه‌رۆك وه‌زيره‌يلێ ئه‌و لێدوان وه‌ناوبانگه دا ك له‌تى وت: له‌وه‌ر خاتر راوناين ئه‌ڵمان من ئاماده‌م هاوپه‌يمانى وه‌ل شه‌يتانا بكه‌م!!
له‌وه‌رده‌م ده‌رانه‌يل به‌سياگ سياسه‌ت له‌ڕوێ كيشه‌ى كورده‌يل فه‌يلى، له‌ى ماوه‌ى ساڵه‌يل گوزه‌يشت چه‌نه‌ها ده‌سته‌واژه ده‌ركه‌فت و زوورميانيش چينه خانه‌ێ كاردانه‌وه‌و ئاقبه‌تيگ دڵته‌نگى له هه‌ڵويست و ئه‌جنداى رووڵه‌يل پيكهاته‌گه له نه‌ته‌وه‌و ته‌ماشاوانه‌يل ئايين و مه‌زه‌و و سياسه‌ت له‌ى وڵاته، يه‌يش كه‌فێده وه‌رچه‌و ك له عراق فريه ئايينى وجوود ديريد و زوورمانيش موسڵمانن قسه له‌بان هاوپه‌يمانێتى وه‌ل شه‌يتانا ناكريه‌ێد وه‌خاتر وه‌ديكردن كووتاييگ ئه‌را مه‌ينه‌تيه‌يل تا دادگه‌رێ له بويچگترين شيوه‌يلێ جيوه‌جێ بدێ.
ئه‌و ئاماره‌يليشه ك تايبه‌تن وه كورده‌يل فه‌يلى ك هه‌رچه‌نى نادروس و گومانليكرياگيشه ، وه‌لێ كاره‌ساته‌گه فيشتر گه‌وراوه كرد له ئاڵشتكردن كيشه‌ێ گشتى ئه‌را كيشه‌ى تاك له‌ناو كۆمه‌ڵگا، ئه‌ويش له‌وه‌ر ئه‌وه‌گ هيمان ديريم له‌وانه‌گ له غوربه‌ت په‌يا بوينه‌و ئه‌وانه‌گ خوه‌يان گوم كردنه فيشترن له شماره‌ى كووچ وه‌پيكرياگه‌يل و ده‌ركرياگه‌يل و مردگه‌يل ده‌فنكرياێ له‌ورا.
يه‌يش راسييگه، ك كرده‌وه‌يل سياسى و ئه‌خلاقييش ديرێد و رێ وه دانيشتن كه‌مينه‌ى زوڵمليكرياێ نايه‌ێد وه‌ل زوورمينه‌ى نازوڵمليكرياێ له‌بان يه‌ك سفره.
ده‌سڵات و حزبه‌يليش سه‌ر خوه‌يان وه كيشه‌يگ له‌ده‌سدرياگ نايه‌رنه ژان، ك هه‌رچه‌نى له‌ناوبردن وه‌جه‌م(جينۆسايد)يش ناو فه‌يليه‌يل به‌رزه‌و كرد و كيشه‌گه‌يان فيشتر خسته وه‌رچه‌و وه گووه‌رى پێوه‌ره‌يلناوده‌وڵه‌تى ئه‌را ئه‌و تاوانه، وه‌لێ سياسه‌ته‌يل رژيم سه‌دام هيمان وه‌رده‌وامه و هه‌ڕه‌شه‌يگه ئه‌رايان، ئمجا بڕياره‌يل ئه‌نجومه‌ن سه‌ركردايه‌تى شۆرش رمياگ رخمانه‌و ناوه‌ێد، به‌ڵكوو نه‌وين ئيراده‌ى جيوه‌جيكردن بڕياره‌يل هاوردنه‌وه‌ێ مافه‌يل رێ وه ئوميد نايه‌ێد گه‌شت له‌ناو كويچه‌و ناوچه‌يل كورد فه‌يلى بكا. هه‌ر له‌وه‌ر ئه‌وه‌يش ساڵه‌يليگه دو لايه‌ن سه‌ركه‌فتگ له‌ى كيشه‌مانه هه‌ن، يه‌كه‌ميان پارێزه‌ره‌يل كيشه‌گه‌مان ك زويتر هه‌ق شه‌كه‌تى خوه‌يان وه‌رگرتن و دويه‌ميش ده‌زگايه‌يل نه‌فكه‌ر تايبه‌تمه‌ند ك هويچ كيشه‌يگ ته‌مام نه‌كردن مه‌گه‌ر له مه‌رز مامڵه‌ێ سياسى و دارايى.
ئاده‌ميزاد فه‌يلى نه‌بايه‌د له‌گشت مه‌سه‌له‌يگ دوژمن نا مه‌هانه يا ره‌فيق و لايه‌نگر ئه‌وانه‌گ بوون موكافئات وه‌پيان نادريه‌ێد، ئه‌ى دى چاره چه‌س و چ هه‌وڵێگ ئه‌دێده سه‌رمايه‌ێ هه‌وڵ ئه‌را كار؟! بيگومان ئاشتى و يه‌كێتى و يه‌كڕزى گه‌وراتر و به‌رزترين ده‌نگ و ئوميدن. ته‌نيا سه‌رمايه‌يش ئه‌را وجودمان يا نه‌وينمان تويش نه‌خوه‌شى سياسه هاتگه‌و هه‌ر چشتيگيش كاردانه‌وه‌ى سياسى ديرێد ك كار له‌بان له‌ناوبردن روحيه‌ت ئاشتى و ژيان هاوبه‌ش ئه‌كا.
ده‌رفه‌ت ته‌ڵاييگ بوى هه‌ناى ك سه‌دام له‌ناوبريا، دڵته‌نگييش ئه‌وه بوى ك ئمڕوو دوياى 14 ساڵ گله‌و ئه‌خوه‌يم ئه‌را خاڵ سفر و ايه‌سه كاره‌گه ئستئناف بكريه‌ێد وه‌شيوه‌يگ جيوازتر له گوزه‌يشت ئه‌را پيشوازى له نه‌وه‌يل تازه‌و قوناغ دويه‌م و سێيه‌م له كار و چالاكيه‌يل.
به‌غدايش به‌هيشت په‌يابويمان و دوزه‌خ چه‌وسيانمان بوێ و ئه‌تويه‌نێديش بدێده دويا ويستگه‌يش ئه‌را لاوردن زوڵم يا بدێده دويا شوونيگ ئه‌را وجوود وه‌جه‌م ئاده‌ميزاد فه‌يلى.
بايه‌سه له‌بانمان هه‌وڵه‌يلمان باريمنه كار دوير له تيه‌ڵى سياسه‌ت و كيشه‌يلى و سه‌ختى بى ئاكام، چوينكه كار سياسى هه‌ميشه هه‌وه‌جه وه كاردانه‌وه ديرێد و جوور ئه‌وه‌گ ئويشن ك نزاى بى كرده‌وه كاريگه‌ر نيه‌و ئاساييشه ك وه‌رگه‌ى وه‌رپرسيارێتى هويچ چشتيگ ناگريم و يه‌يش ماناى ئه‌وه‌سه كرده‌وه‌مان هويچه و له هويچيش ناتوانيم مقه‌يه‌تى له چشتيگ بكه‌يم مه‌گه‌ر له‌وه‌گ ك جى خياڵه.
وه دگانناين وه راسى ئه‌وه‌سه ك گوزه‌يشته‌يگ بى به‌رنامه برديمنه سه‌ر و ويرانكردن شيوازه‌يل باويش ئاسان نيه له شوونيگ و چه‌وه‌ڕى ئه‌و قورتاركه‌ريشه ناكه‌يم ك له دويناى هه‌ڵكه‌فت به‌يانه‌يل ئاشتى بڵاو ئه‌كا يا دادگاى باڵاى تاوانه‌يل جاريگتر ده‌س بكاده ده‌ركردن بڕياره‌يل تازه‌يگ.
ئمجا نوسحه‌ت و نزيكه‌وبوين ته‌نيا سه‌رمايه‌ێ ده‌سه‌وه‌ريگن له‌ناو ده‌سمان و باقى چشته‌يليش هه‌وه‌جه وه وه‌خت فيشتر ديرن، ئيسه‌يش له‌گشت وه‌خته‌يل نازگتره وه نسبه‌ت ئه‌را هه‌ڵوژاردنه‌يل ئاينده‌و به‌رزه‌وبوين راده‌ى بازاڕ سياسه‌ت، ئمجا خوه‌زيه‌و فه‌يليه‌يل وجووديگ بياشتان له‌ى به‌رزه‌وبوينه.
عه‌لى حسێن فه‌يلى