شه‌فه‌ق نيوز/ وه‌ل نزيكه‌وبوين هه‌ڵوژاردنه‌يل نوێنه‌رايه‌تى عراقى پڕوپاگه‌نده‌ێ كانديده‌يل و لايه‌نه‌يل سياسى چيه قوناغ تازه‌يگ. له گشت حاڵه‌ته‌يليش فه‌رز بكه‌يم ك ئه‌گه‌ر نزيكه‌ى 10 كانديد ئه‌را كۆتاى فه‌يليه‌يل كانديد بكه‌يم له پاريزگاى واست و شماره‌ى ده‌نگده‌ره‌يل نائاشكراس! ئه‌وه دوينيم ك له خاسترين حاڵه‌ته‌يليگ 20كه‌س له جه‌م 6904 كانديد له عراق گشتيان له كورده‌يل فه‌يليين، ئه‌وه ريژه‌يان ئه‌دێده كه‌متر وه شماره‌ى فريه‌يگ له 1% و يه‌يش گومان له‌لاى مه‌ردمان تر دروس ئه‌كا له‌باره‌ى جه‌م ته‌واو ريژه‌ى فه‌يليه‌يل له عراق.
له وه‌رانوه‌ر ئى شماره‌يشه له كانديده‌يل بايه‌سه ته‌ماشاى مه‌يدان ركابه‌رى و ديد مه‌ردم و شيوه‌ى مامڵه ئه‌راى بكه‌يم! وه نسبه‌ت ئه‌را فه‌يليه‌يليش وجوود نه‌خت و پيشبينيه‌يل مه‌سه‌له‌يگ سروشتى و خواسته‌و وجوود ديد سياسى و رووشنهويرييش مه‌سه‌له‌يگ قه‌بولكرياگه، وه‌لێ ئه‌و نه‌خته ك هاوشيوه‌ى تيرۆره و ئه‌و دروشمه‌يله ك ناوه‌ڕووك نه‌يرێد و به‌رنامه‌يل ويرانكه‌ريش له چوارچيوه‌ى هه‌ر ئازادييگ راسكانيه‌و قه‌يمه‌تدار ئه‌دێ؟
كوشتن كه‌سايه‌ى ديارده‌يگ سورشتيه له‌ى قوناغه وه‌تايبه‌ت له دونياى مه‌جازى و له وه‌خته‌يل هه‌ڵوژاردنه‌يل وه‌بى لاكردنه‌وه ئه‌را هه‌ر په‌يڕه‌ويگ ئه‌خلاقى و ئنسانى و پيشه‌يى و وه‌ناوه‌يل درووكانيه‌و ئاژاوه دروس ئه‌كه‌ن، ك جى داخه ئى مه‌سه‌له‌يله له‌ناو كومه‌ڵگاى فه‌يلى وجوود ديرێد و شايه‌ت له به‌عزه حاڵه‌ت و وه‌خته‌يليگيش خراوتر بدێ.
هه‌رچه‌نى ك دامه‌زرانن گرووپه‌يل و ده‌سه‌و لاپه‌ره‌يل تايبه‌ت وه‌خاتر ئامانج و خواسته‌يليگ دياريكرياێ مه‌سه‌له‌ێ ره‌وايگه‌و تازه نيه، وه‌لێ مه‌گه‌ر لايه‌نه‌يل خراو داشتوود ئه‌وه له‌ى حاڵه‌ته ئيچنه ره‌فتاره‌يليگ وهه‌ڵسووكه‌فتيگ ئه‌چێده‌و ئه‌را ئه‌وه‌گ هويچ كه‌سيگ سه‌رپه‌رشى له‌بان دونياى مه‌جازى ناكاو وه‌ناو ئازادى راده‌رخستنه‌و كاره‌يل خراو مه‌عنه‌وى ئه‌كريه‌ێد.
وه نسبه‌ت ئه‌را ئيمه‌ى فه‌يليه‌يل ئه‌يه راسى ئاشكرايگه ك هه‌رچه‌نى وه به‌راورد وه‌ل گوزه‌يشته دوينيد ئاست متمانه له‌لاى كه‌سانيگ وه پڕوپاگه‌نده‌يل دويناى مه‌جازى تاڕاده‌يگ كه‌م كردگه، وه‌لێ مه‌سه‌له‌گه وه‌رده‌وامه! وه‌ل ئه‌وه‌يشا دوينيم له وه‌ختيگ ك هيمان فراوانييگ ئه‌را دعايه‌ى فه‌رمى هه‌ڵوژاردن هه‌س، وه‌لێ لاپه‌ڕه‌يليگ هه‌ر له‌ماوه‌ى زوييگه‌و وه‌و دعايه‌يله‌و ده‌سوه‌پيكرد.
جى داخه لاپه‌ڕه‌يل چالاكوانه‌يل كورد فه‌يلى له‌ى وه‌خته‌يله فيشتر له كوشتن سياسى نزيكه‌و بوون وه ئه‌وه‌گ چالاكييگ مه‌ده‌نيه‌و له هه‌وه‌جه‌ێ كانديده‌يل سه‌رچه‌وه گرتگه وه‌ل خستنه‌ڕوێ به‌رنامه‌يل ئه‌را چاره‌سه‌ر بارودوخ پيكهاته‌گه له هه‌ڵوژاردنه‌يل!
بيگومان ئه‌وانه‌گ ئى لاپه‌ڕه‌يله ئه‌وه‌نه رييه‌وه‌و ئه‌وانه‌گ به‌شدار چالاكن بايه‌سه پابه‌ند بوون وه سياسه‌ت هاوسه‌نگ و گونجياگ و ئه‌قڵانيه‌ت، چوينكه به‌عزيگ لايه‌نه‌يل هه‌ميشه وه‌قه‌يرانكردن بارودوخه‌گه و سه‌خته‌وكردن په‌يوه‌نديه‌يل و دروسكردن باڵ و ده‌سه‌و جه‌ماعه‌ت جياجيا ئه‌خوازن بيجگه ئاشتى و يه‌كگرتن و حورمه‌تگرتن يه‌كترى و وه‌رگرى له مافه‌يل يه‌كترى. وه‌ل ئه‌وه‌يشا كه‌م نيين ئه‌وانه‌گ دريغييان كه‌م ئه‌كه‌ن و ئه‌زانن ك مه‌سه‌له‌يل(نه‌ته‌وه‌ى فه‌يلى و پيكهاته‌ى فه‌يلى و قه‌واره يا هه‌رێم فه‌يلى و...هتد)گشت ئه‌يانه دويره‌وكه‌فتنه له نه‌ته‌وه‌و كيشانه وه‌ره‌و مه‌زه‌و له مه‌يدانه‌يل سياسى ك هويچيگ له‌تى نيه خزمه‌ت وه ئاده‌ميزاد كورد زوڵمليكرياێ بڕه‌سنێد، به‌ڵكوو به‌شبوين و داوڕيان نه‌ته‌وه‌يى و كۆمه‌ڵايه‌تى و سياسى و ته‌ره‌كيانيگ مه‌زه‌وى له‌لى ئه‌كه‌فێده‌و.
ئه‌تويه‌نيم ده‌س بكه‌يمنه دعايه‌كردن ئه‌را ئه‌و كانديده ك ئه‌خوازيمنه‌ى، وه‌لێ نه‌ك وه كوشتن كه‌سايه‌تى مه‌ردمان تر. ئه‌تويه‌نيم وه‌رگرى له به‌رنامه‌و پرووژه‌يل كانديده‌يل و لايه‌نه‌يل تايبه‌ت بكه‌يم، وه‌لێ نه‌ك وه فكر لايه‌نه‌يل تر. ئه‌تويه‌نيم روێ له گرژكردن ئحساسه‌يل وئحساس ناوچه‌يى و هووزايه‌تى و تايفى بكه‌يم، وه‌لێ نه‌ك وه‌حاشاكردن له ملله‌تمان.
بايه‌سه مه‌شق سياسه‌ت بكه‌يم، وه‌لێ بازرگانيكردن وه ئايين و مه‌زه‌و وه نرخ گران و ئه‌رزانكردن ملله‌ت و نه‌ته‌وه ره‌وا نيه. ئه‌وانه‌گ روێ له ئيچنه شيوازه‌يليگ ئه‌كه‌ن ناتويه‌نن ركابه‌رى بكه‌ن له بارودوخ ئاسايى و به‌رنامه‌يليان پيشكه‌ش بكه‌ن و ناچارن روێ له له‌كه‌داركردن سومعه‌ت و حاشاكردن بكه‌ن.
گشت ئه‌يانه له ئاكام ده‌سهه‌ڵگرتن له بنه‌ماو نه‌ريته‌يل ئنسانى ئه‌ياد له پرووسه‌ى سه‌ركه‌فتن و شكه‌شت سياسى، ئه‌وانه‌گيش مه‌شق ئى ره‌فتاره ئه‌كه‌ن بايه‌سه بزانن ك: گشت كانديده‌يل مه‌يل وه‌رگرتن به‌رزترين شماره له ده‌نگه‌يل ديرن، وه‌لێ هه‌ناى لايه‌ن راسكانى ئاشكرا ئه‌دێ ئه‌را ئيچنه قه‌وڵ و ره‌فتاره‌يليگ دى عوزر و جواويگ نيه. ئمجا ئى ره‌فتاره‌يله له ئاكا شيوانن و دويرگرتنه له مه‌سه‌له‌يل بنه‌مايى و كيشه‌يل ياسايى و مێژوويى كورده‌يل فه‌يلى، يه‌يش ماڵ فه‌يلى يه‌كه‌و ناخه‌ێد و نايلێد رزه‌يل فه‌يلى يه‌كه‌و بگرتن!! هه‌ر وه‌و خاتريشه ئه‌و كانديده ك باوه‌ڕى ئه‌وه‌سه وه‌كارهاوردن ئى سياسه‌ت و شيوازه چشتيگ شه‌رعيه له‌وه‌ر خاتر سه‌ركه‌فتن، ئه‌وه بيگومان سوو ئنكار خاوه‌ن ئى لاپه‌ڕه‌يله ئه‌كاو لايگ ناكاده لاى ئه‌و ده‌سه‌و گرووپه‌يله ك رێ ئه‌را سه‌ركه‌فتنى خوه‌شكرد وه كوشتن كه‌سايه‌تى مه‌ردمان تر.
عه‌لى حسێن فه‌يلى