شەفەق نیوز- بەهرام وەڵەدبەیگی، بەرپرس ئەنسیتو کورد تێهران، پێشتە‌وانی خوەێ لە نریان (خەڵات فەیلی‌دووسی) ئێعڵام کرد.
ئەوی یە فرەتر لە سی ساڵە، خوەێ بنەڕانەر کارەێل فرەیێگ دە کوردەواری بییە و دامەزرانن هەفتەنامەێ جەریانساز (ئاوێیەر/ آبیدر) دە سنە و دە رۆژنامەی ئاشتی لە تاران و ده دەهەێ هەفتا ئوو ئەنستیتو کورد دە تێهران، سەختییەێل و خاسییەێل بنیات‌سازی، رەیین دناسی دە وتارێ کوڵ وەیجوورە وتگە:
کورد فەیلی، یەکێ لەو هووزەێل کوردەسە ک دە دریژای میژووی کوردایەتی هەمیشە هەم دە ئێران و هەم دە عراق جەریانساز بییە.
دە عراق، کورد فه‌یلی دە ئەو بان‌بانەێل دامەزرانن حزبەێل کوردی، شیووعی و چۆچشتێگیش سەقام‌دەر کار ناسیوونالیسم عراقی ک جیاواز لە ناسیوونالیسم عەراوی و پانعەربیسمەم ئوو سەقام‌دەر بڕێ لە حزبەێل شیعی هەم، وە بەش خوەێ بییە ئوو لە یە گرینگترەگەێ ئەوەسە ک ئی خەڵکە دە دەورانێ ک خوێن و گیان داین وەگەرەک بییە کەفتگه‌سە شوون حزبایەتی و خەبات و کوڕانە و بێ‌هیچ رێچاو داشتنێ گیان داگە، نە دە وەخت نان خواستن و نان خواردن دە بان حزبایەتی ئوو یە خوەێ تایبەتمەندی ک کورد فەیلییە لە خەبات گیان داگە و نان نەخواردگە.
یە هەر چەن تایبەتمەندیێگە گەپ و پاک باوجی دە دنیا سیاسەت ک کەس وە رێ کەس نەدوسێ و مەندیر یەکترەکی ماین وە بێ‌سیاسەتی و سادە بیین هساو دبێ، یەیش خوەێ هن گەپێگە ک خسار دە بان خسار ئەڕا ئەو گەلە ک دوروستر و ئنسانی‌ترو ئەخڵاقی‌تر هاتگەسە ئی ناوەکییە دیارێ، چوون وەداخەو دنیاێ سیاسەت دە خاوەرمیانە هە هووکارەێ ئەو داڕێشتە گەنە بییە ک دە قەێرێ لە قسەێلەێ ماکیاولی هاتگە و سەر یەکتری تلانن و ئەڵپلیان وەر ئەو ئیلا و ئەولا و حەتتا دەس دووسی وەرد دژمن داین و وە جی هیشتن دووس دە وەراوەر دژمن و ... گشتێ دە نامێ باوە تا بڕەسێ وە ئایم‌فرووشی و براکوژی، وە داخەوە؟ یا بەختەوەرانە؟ م وەڕاسی نەدزانم چە بویشم، بویشم (وەداخەوە) ئەڕا نهات و نەهامەت و (چۆ بەدبەختی) کورد فەیلی لەێ‌وا نەبییە و هە ئی سداقەت و خاس و راس ماین کورد فەیلی خوەێ نامێ لە دنیای سیاسەت سڕییە یا بویشم (بەختەوەرانە) و (چۆ خوەشبەختی) کورد فەیلی وەێجوورە نه‌بییە و وه‌ێ کارەوە وە گشت سیاسی‌ئایمەێلە و گرد حزبەێلە وتگە؛ هووزەگە، ئەخڵاق نەمردگە هێمان، گورد ئەڵە وەتان بنن و لەێ وا نەتۆنگنن و تووز نەکن ک خوەتان و و بڕێ دە ئی تەم و تووز درووکانییە ک خستنەسە رێ گومەو نەبن و رێگەێ گوم نەکەن چوون ئەر ئیوەیش گومێ بکەن هەمجا رێگەگە خۆ خوەێ گومەو نەدبێ یەکێ تر هەس ک وە ڕیشت خاس و ڕاسێ دکەێگەێ وە دی و شوونەێ ئیوە دگرێ، یە وسەوسە دیرێگ و سووخت و ساز باوجی بەردەوام نەدمینێ.
ده عراق، کورد فەیلی، بەش فرەترێ دە رووژنامەوانی سیاسی کوردی و عەراوی هەم، لە بنەڕەتەو داشتگە، دە ئێرانیش هە لەێ‌وا بییە و یەکم رووژنامەێل کوردی یەکێ دە مەهاباد بییە ک ماموستا شەپووڵ ناگەسە و ئەو یەکەییش مەرحووم ماموستا حسێن فەیلی دە ئیلام و کرماشان.
دە تێهرانیش یەکم چین کورد فەیلی فرەتر دە شوون وە‌دی کردن شوناس خوەیان بینە چوون تووش قەیڕان هوویەت هاتنە لە سەرا، وە بان یەوە چوون یەکێ لە هەدەفەێلەیان رێزداری و زینگ هیشتن ویر 22 هزار کورد فه‌یلی جوانه‌مەرگ ک یە خوەێ بی وە چین خەیرێ ئەڕا حوسەینە و خەیرییە سازین کوردەێل فەیلی دە تێهران ک جا و لایێگ ئەڕا خوەیان گرتنە دەس و دە بان نەخشەێ جوغرافیاێ تێهرانیش چەن جار نام کورد فەیلی، واژا کریا و بان ئەڵ بان نووسریا.
ئێسە ک دیم ماڵگە شەفەق کوردەێل فەیلی دە بەغدا ئوو دو مانگنامەگەێ یانێ گوڵ‌سوو (وە کوردی) ئوو فەیلی (وە عەراوی) ئی باسە خستنەسە ڕێ فرە هیوادارەو بیم ک کورد فەیلی هێمانیش ئەو بی و رایە ئەڕا جمانن وڵات دە بەغدا و عراق و گشت دنیا لە دەس نەداگە و کورد فه‌یلی، هێمانیش ئەو تایبەتمەندی خوەێیە ک دە پەنجاگان و هەشتاگان زایەنی داشتگە و دە رێ کوردایەتی و حزبایەتی بردەێ وە کار، ئیجارە دخوازێ وە نام خوەێ و ئەڕا کارێگ مەدەنی ک ئەو پتانسیلە دیرێ ک جەهانییەو بکرێ ببێگە رەسەت تا بدەێگە نیشان ک هێمانیش نەمردگە و نەیش دمرێ.
منیش وە بەش خوەم و لە لایەن خوەم و ئەنستیتو کورد داخوازیارییم لە وڵات و کورد و بغەیران کورد یەسە ک لپلن وه‌ر ئەو ئی جمێشتە و وە یە جوور کارێگێ ئنسانی بنووڕن چوون ئی خەڵکە هەم ژینووساید و کوشتو بڕ کریاگە دە ئەنفاڵ و مەقابرجەمعی ئەوەیش وە بێ‌سووچ و بێ‌تاوان، هەمیش ژینووساید فەرەەنگی کریاگە دە پرووژەێل تەعریب و کوت کردن ئەڵەیان ک دە نام ماڵ خوەیانیش وە کوردی قسە نەکەن ئوو هەمیش وە جاجیواز کردن و کووچانن وە دەرەوەێ عراق و تاڕانن لە عراق و هەمجا وە بەتاڵ کردن ناسنامە‌گەیانیش.
ها مل گشتمان ک بەشداری بکه‌یمن دە ئی کار خاسە وەگەرد براو خوه‌شکەێل چالاک کورد فەیلی خوەمان.
پێشنیار م یەسە ک خەڵات نەورووز هە دە سەرەتاێ ساڵ تازەێ زایەنی نەدرێ، هەر دە سەرەتاێ ساڵ تازەێ نەورووز کوردی هەم بدرێ چوون ئیمەی کورد هە لە جاران تا وە بانانەو جەژن نەورووز ئەڕامان رێز فرەیێگ داشتگە و دیرێ و خوەێ هە جوور نیشانێ لە کوردایەتی بییە ئەڕامان و نەورووز خوەێ دە حەوزەێ تەمەدونی گەورێگ هە لە کوردستانات تا وە ئێران و تاجیکستان و عراق و ئازەربایجان و ئەڤغانستان و لوبنان و سووریە و کشمیر و فرە لە وڵاتەێلێ تر، هەمیشان هە ئاگرێ بڵووزە داگە و وجاخێ گریسیاگە و خووە ک دە ورشە ورشە ئی ئاگر دێرینە هەمجا نام بەرز بڵن هووز کورد فەیلی بدرەوشێگەو وەگەرد ئی خەڵاتی کردنە لە ئەوانە ک رێز لە کورد فەیلی نانە و دنن.