شەفەق نیوز/ کلیپ گورانی "یار" وە ئاوازدانەری و ژەنیاری موزیكزان كورد، فەرنوود ئیلهامی، وە دەنگ سپێهر زوالنووریان، وە ژەنین دەف حسێن مێنشادی و وە كەڵكوەرگردن لە مەقامە رەسەنەیل و شیوەی نوویگ ئەرا رەسەنایەتی تەنبوور بڵاو کریا.
ئەو مەقامە ک لە گورانی "یار" خوەنیایە لە مەقام "خامۆشە گیان" ئەڵگەڕیایە و لە كۆتایی ئی بەرهەمە كەڵك لە دوو مەقام لە مەقامەیل تەنبوور ئەڵگەڕیایە ک مەقامە سەرەكییەگە نیەژەنیەێد.
"فەرنوود ئیلهامی" لە بنەماڵەیگ هونەرمەن لە شار سەحنەی كرماشان لەداڵگبۊە، باوەگەورەی، مامووستا سەید "ئەیاز قەزوینەیی"، لە مامووستایل خاوەن شیواز و ناوداری تەنبوور بۊ و باوگییش یەکیگ لە دەرهێنەرە وەرچەوەیل شانۆ شار سەحنە تیەێدە ئەژمار.
ئەو چاشیان ئامێر مەقام تەنبوور لە مناڵیی دەسوەپی كرد و هەر لەو سەردەمە لە خزمەت مامووستایل شارەزای مەقام لە شار سەحنە كەڵكی فرەیگ وەرگرد، لە تەمەن 18 و 22 ساڵییەو لە فێستیواڵەیل مۆسیقای خوەرئاوای ئیران و تاقیكرن گرینگ "باربەد"، پلەی یەكەمی لە بەش تاكژەنی تەنبوور وەدەس هاورد.
ئی هونەرمەنە لە ساڵ 2006 لە خزمەت فەرید ئیلهامیی برای لە گرووپ مۆسیقای "فیردەوسی" بڕیگ بەرهەم پێشكەش و تۆمار کردن، لەوانە: ئەلبووم "درەفشی كاویانی" و "شانامەی كوردی" وە دەنگ گورانیچڕ ناودار كورد مامووستا شەهرام نازری.