شەفەق نیوز/ نووترین بەرهەم کەیهان کەلهوڕ ژەنیار ناودار کورد وە هاوکاریی چەن ژەنیاریگ لە شوێنەەیل جیاجیا لە جەهان، وە ئامانج ڕێزلێنان لە نەیشابوور، بڵاو کریا.
نووترین بەرهەم کەیهان کەلهوڕ هونەرمەن ناسریاگ وە ناونیشان "شین، چەشن شەو فیرۆزە" ک وە هاوکاری گرووپ ری ئاورێشم بڵاو کریا.
کەیهان کەلهوڕ لە هەژمار فەرمی خوەی لە تووڕە کۆمەڵایەتییەکان ئەلبووم ڕێزلێنان لە نەیشابوور نووترین بەرهەم هونەریەتی بڵاو کردگە ک ئی کار ئەرا ئەوەس چۊنکە نەیشابوور یەکیگ لە شارەیل ری ئەوریشم بۊیە.
مایکل لینگستۆن ئاهەنگساز ئی ئەلبوومە و ئەو ژەنیارەیلە ک وەرجەیە وەرد کەیهان کەلهوڕ هاوکاری کردنە، لەی ئەلبوومیشە هونەر خوەیان دانانە.
کەیهان کەلهوڕ، هونەرمەن ژەنیار و ئاوازدانەر کورد خەڵک کرماشانە، ک وەرجەیە چەن ئەلبوومیگ ئەرزشدار بڵاو کردگە و چەن کۆنسێرتیگ لە ئیران و لە ئاست جەهان وەڕیەەلو بردگە و خاوەن چەن خەڵاتیگ ناودەوڵەتییە.
ویستگەیل ژیان کەیهان کەلهوڕ، هونەرمەدن ناسریاگ کورد کەیهان کەلهوڕ لە ساڵ ١٩٦٣ لە قەزاى شاباد (ئیسلام ئاباد) لە پارێزگاى کرماشان لە کوردستان ئیران لەداڵگبۊیە. لە تەمەن ٥ ساڵییەو دەس وە هووکارەبۊن کار میوزیک کردگە.
لە ١٢ ساڵانی وە شیوەیگ شارەزایانە درۊژی وە کار مۆسیقا داگە و لە ١٣ ساڵانی بۊیەسد ئەندام ئۆرکێسترای رادیۆ و تەلەفزیۆن ئیران لە کرماشان. لە تەمەن ١٧ ساڵانی چگە ئیتاڵیا و ئیجا ئەرا خوەنەواری رەسیەسە کەنەدا بەش ئاوازدانان لە زانکۆى کارلتۆن ئۆتاوا تەواو کردگە.
لە وەخت جەنگ ئیران و عراق (١٩٨٠ - ١٩٨٨) موشەکێک کەفتە ماڵیان و گشت خێزانەگەى لەدەست داگە.
ئامێر تایبەت میوزیکی کەیهان کەلهوڕ، کەمانچە (جۆزە)س و وەگەرد کەمانچەیش تەموور و سێتار و شاکەمانیش ژەنێد.
کەیهان کەلهوڕ لە کارەیل هونەریی وەگەرد هونەرمەنەیل گەلەیل ئەمریکا، چین، تورکیا، هێندستان، هۆڵەندا کار هونەری هاوبەشى ئەنجام داگە، و ئەوەیش کردەی کەسایەتییگ هونەریى جەهانی.