شەفەق نیوز- هەولێر

وەڕێوەبەرایەتی سینەما و شانۆ لە هەولێر، رووژ یەکشەممە، خەوەردا لە ئامادەکارییەیلی ئەرا دەسوەپیکردن چالاکییەیل هونەری لە ماوەی ئایەندە، دیاری کرد کە سازکردن فیستیڤاڵ شانۆیی ناودەوڵەتی لەبان پۊلدارکردن دارایی وسیاس.

وەڕێوەبەر سینەما و شانۆی هەولێر، شاخەوان مستەفا، لە کۆنگرەیگ رووژنامەوانی کە ئاژانس شەفەق نیوز ئامادەی بۊ، وت کە "وەڕێوەبەرایەتییەگە پلانیگ تەواو ئامادە کردگە ئەرا دووارە دەسکردن وە چالاکییە شانۆییەیل لە هەولێر، کە رێکخستن کۆڕەیل هزری و چاپکردن کتاوەیل و نامیلکەیل تایبەت وە کار شانۆیی وەخوەی گرێد، بیجگە لە دەسکردن وە بەرنامەی خول پایزی ئەرا شانۆ کە 5 گەڕ شانۆیی لەخوەی گرێد".

مستەفا هەمیش وت کە "هەردوگ هەفتەی ئایەندە دەسکردن وە یەکەم نمایش شانۆیی وەخوەیان دوینن کە چەپکیگ لە هونەرمەنەیل گەنج لەناو ئی چالاکییەیلە پیشکەشی کەن".

لەباوەت فیستیڤاڵ شانۆیی ناودەوڵەتی، مستەفا دیاری کرد کە "شارەگە وەرجەیە رێکخستن 8 خول سەرکەفتگ لەی فیستیڤاڵە وەخوەی دیە، وەڕێوەبەرایەتییەگە ئی ساڵە گشت ئامادەکارییەیل هونەری و لۆجستییەیل ئەرا سازکردن خول نوو تەواو کردگە".

وتیش کە "رێکارەیل ئیرنگە لەبان دابینکردن پاڵپشتی دارایی و تەرخانکردن بودجە لەلایەن وەزارەت دارایی لە حکومەت هەرێم کوردستانەو وسیاس"، دووپات کرد کە "هەنای رەزامەنی دارایی دەرچوود، دەس کریەێدە مکیسکردن تیمە شانۆییە بەشدارەیل و دیاریکردن هۆڵەیل ئەرا میوانداریکردن نمایشەیل".