هونه‌رمه‌ند مه‌سعود عه‌زيزی سه‌باره‌ت وه‌تازه‌ترين كار هونه‌ريی له‌بوار ميوزيك و گورانی كوردی، له‌لێدوان تايبه‌تيگ ئه‌ڕا "شه‌فه‌ق نيوز" وت: "ئالبومه تازه‌گه‌م وه‌ناو (هه‌ڵپه‌ڕكه) وه‌سێ زاراوه‌ی (كه‌ڵهوڕی، سۆرانی و هه‌ورامی)يه ك بڕياره له نه‌ورووز 2713ه‌ی كوردی بڵاوه‌و بكريه‌ێد، وه‌لی تا ئيسه ديار نييه ك كام كۆمپانيا له كوردستان كار په‌خش و بڵاوه‌و كردنی ئه‌نجام ده‌ێد".
له‌باره‌ی ناوه‌ڕوك ئالبومه نووه‌گه‌ی هه‌ميش وت: "ئالبوم هه‌ڵپه‌ڕكه، 8 تراك گورانی له‌خوه‌ێ گردێه ك تراكيگی وه‌زاراوه‌ی سۆرانی و تراكيگيشی وه‌زاراوه‌ی هه‌ورامی و ئه‌و باقييشی وه‌زاراوه‌ی كه‌ڵهوڕيه. تێكست گورانييه‌گان له‌لايه‌ن هه‌ر كام له شاعره‌يل: سه‌عيد عباده‌تيان، په‌رويز به‌نه‌فشی و ئاراس جه‌واد نويسريانه‌و تێكست يه‌كێگ له‌گورانيه‌گانيش له‌لايه‌ن خوه‌مه‌و نويسرياس و يه‌كێگيانيش فۆلكلۆره، كار دابه‌شكردن و موزيكيش له‌لايه‌ن هونه‌رمه‌نده‌يل ده‌يڤيد نيازی و سه‌عيد لوتفی ئه‌نجام درياس".
مه‌سعود عه‌زيزی خه‌ڵك شار گيه‌ڵان سه‌ر وه‌پارێزگای كرماشانه له‌ڕووژهه‌ڵات كوردستان و يه‌كێگه له‌و هونه‌رمه‌نده‌يله ك له‌ی ساڵه‌يل دوياخره خزمه‌ته‌يل فره‌ێگ وه هونه‌ر و موزيك كوردی كردێه وه‌تايبه‌ت له‌بوار هونه‌ر وه‌شێوه‌زار كوردی باشوور.
ا. ج