شەفەق نیوز/ هونەرمەن شیوەکار فەرەنسی پیێر سولاج، لە تەمەن دویەم دویای سەد ساڵی، دویای میژوو درویژیگ لە هونەری، ک تابلۆیلی وە پلەیل جیاوازیگ لە ڕەنگ سیا وەناوبانگ بوین، دویاکووچی کرد.

ئەلفرێد باشمان برادەر کۆنەی پیێر سولاج  وت: خەوەر خەفەتبارییگە، وەرجە کەمێگ وەگەرد ژنەگەی قسە کردم، ک وەرجە چەن رووژیگ ئاهەنگ جەژن ژنخوازی هەشتایان کردن.

ئیمانۆیل ماکرۆن سەرۆک فەرەنسا لەبان مردن سولاج لە تویتەر نویسان: سولاج زانست چوین دووارە ڕەنگ سیا بکەێدە بەهرە، هیشت رووشنایی لەلی دەرچوود، وەگەرد ڕەنگ سیایش، کارەیلی نموونەی زنییگ نشان دان، ک گشتمان ئومێد لەکی بەیمن.

ریما عەبدولمەلیک خانمە وەزیر روشنهویری فەرنسا وت: کەلەمەی گەورەیگە لە جەهان هونەری و فەرەنسا.

ئێلیزابێت بۆرن، خانمە سەرۆک وەزیرەیل لەبان تویتەر نویسان: سولاج بەرهەم گەپیگ لە شوین خوەی هیشتەجی، ک لە سەردەم رەد کەێد، و دووارە دروس ڕەنگ سیا کرد وەشیوەی رەنگینیگ، و ناو "کویخای رووشنایی" بڕیە باڵای.

سولاج ک لە ٢٤ دیسەمبەر ١٩١٩ لەداڵگبویە، وەناوبانگی فراوانیگ هەرلە پەنجایل سەدەی گوزەشتە پەیا کرد، و تابلۆیکی چینە ناو گرنگترین مۆزەخانەیل جەهان.

ئەرا زیاتر لە ٧٥ ساڵ، کارەیلی بوینە گرنگی دامەزراوەیل کەلتوری و بازاڕ هونەر، ک لە نۆڤەمبەر ٢٠٢١، یەکیگ لە تابلۆیلی وە ٢٠،٢ مەلیۆن دۆلار لە نیویۆرک فرووشیا.