كۆڕ ره‌خنه و هه‌ڵسه‌نگانن و شیه‌وكردن سێ فیلم سینه‌مایی دريژ "فره دوير، فره نزیك"، "هه‌ر وه‌ی ئاساییه" و "كڵووێگ قه‌ن" له ده‌رهاوردن سه‌یدڕه‌زا میركه‌ریمی له حه‌وزه‌ی هونه‌ری شار ئیلام وه‌ڕێه‌و‌چوی.
ئه‌و كۆڕه له لایه‌ن به‌ش وێنه‌یی حه‌وزه‌ی هونه‌ری پارێزگای ئیلام وه مه‌به‌س نمایش كردن فیلم مه‌ردمێگ وه‌يجووره ك هه‌ڵگر مانای قويلێگه له جه‌هان ده‌ورووه‌ر و بابه‌ت و ناوه‌رۆكه‌يلی تایبه‌ت وه ناسین ژیان وه تماشاكه‌ره‌يل ساز دريا.
له رووژه‌یل گوزه‌يشته فیلم سینه‌مایی "كڵووێگ قه‌ن" له سێيه‌مین خول فستیڤاڵ ناونه‌ته‌وه‌یی فیلمه‌يل ئيرانی له‌نده‌ن له وڵات به‌ریتانیا نمایش كريا.
ئی فیلمه مانگ گوزه‌يشته له 24ـه‌مین خول فستیڤاڵ ناونه‌ته‌وه‌یی فیلم "قه‌رتاج" له وڵات توونس نمایش كريا.
ئی فیلمه پاره‌كه له سینه‌مایل سه‌رتاسه‌ر وڵاته‌یل ئيران و ئه‌مه‌ریكا نمایشكريا و تا ئيسه له ئاست جه‌هان له بڕێگ فستیڤاڵ ناونه‌ته‌وه‌یی، له‌وانه: 38ـه‌مین خول فستیڤاڵ ناونه‌ته‌وه‌یی فیلم "سیاتێل" له ئه‌مه‌ریكا و له به‌ش پێشبڕكێ 13مین خول فستیڤاڵ ناونه‌ته‌وه‌یی فیلم "لۆكانیا" له شار پیستچی له باشوور وڵاتی ئیتالیا به‌شداری كردگه و له لایه‌ن ره‌خنه‌گره‌یل گۆڤاره‌يل ناودار سینه‌مای جه‌هان وه فیلمێگ ساكار، ئنسانيانه و دووساننه له سینه‌مای ئيران ناسنرياس.
"كڵوو قه‌نێگ" به‌رهه‌م حه‌وزه‌ی هونه‌ری ئيرانه، له‌تێ بڕێگ ئه‌كته‌ر ناودار، له‌وانه: سه‌عید پوورسه‌میمی، ڕه‌زا كیانیان، فه‌رهاد ئه‌سڵانی، نگار جه‌واهریان، په‌ریوه‌ش نه‌زه‌رییه و ... رۆڵ سه‌ره‌كی داشتنه.
PNA
ا. ج