شەفەق نیوز/ خانمە شاعر ئۆکرانی ئۊشێد: هەرچەگ باس مرۆیی کەیمن "دروە"، ک ئیمە توانای شکەنجەداین وەشیوەیگ دیریمن ک بڕوا نێکریەێد.   

‏گەورەترین پەیکەر ئەرا خانمە شاعر ئۆکرانی "ئانا ئەخماتۆفا" وەرانوەر کریستی، لەشان چەم نیڤا وسیاگە، ناوبەین جادەی شبالیرنایا و بەنداو رویسبیر (Robespierre Embankment) ، و یە کەیگە لە گەورەترین ئاسەواری لە سان بترسبیرگ ئەرا خانم شاعر مەزن سەدەی بیس ئانا ئەخماتۆفا.  

ئی پەیکەر فرە رەنگینە لە ساڵ ٢٠٠٦ لە ئاهەنگ چلەم ساڵیاد کووچکردن شاعرەگە سازیا، ک وەشیوەیگ سومبلی کەفێدە وەردەم زیندان Kresty Holding، ک ئەرا چەن جاریگ  شۊەگەی ئەخماتۆفا "نیکۆلای بونین" ک رخنەگر هونەری بۊ ، و کورەگەی "لیف جۆمیلیف" لە سیەیل سەدەی گوزەشتە لەیرا زیندانی کریان.    

ئەخماتۆفا نۊسان:  ٣٠٠ ساعەت لەناو بڕیگ لە ژن و داڵگەیل لەوەردەم ئی زیندانە وسیاگە، وە چەوەڕی خەوەریگ یا تەقەلای رەدکردن خوەراکیگ ئەرا دووسەیلی لەناو. 

جی باسە ک ئی زیندانە "وەرجە شۆڕش" زیندانە سیاسیەیلە وەگەرد تاوانکارەیل لەناوی تیکڵا کریان، و هەرلە؛ تروتسکی و نۊسەر شانۆ ئەناتولی لۆناشارسکی، و هەمیش میژوونۊس و نۊسەر ئەنتونۆف ئۆفسینکۆ لە ئوکتۆبەر ١٩١٧ لەناو ئی زیندانی بۊنە.   

ئی پەیکەر بڕۆنزیە ک بەرزیەگەی رەسێدە سێ مەتر، وەدەس شیوەکار گالینا دودونۆفا و ئەندازیار ڤلادیمێر ریبۆ دروس کریاگە.