ساهر له دیمانه‌ێگ وه‌ل كه‌ناڵ ئاسمانی NRT ووتێه: بڕیار بوێه له مانگ گوزه‌یشته باتاگ ئه‌ڕا هه‌رێم كوردستان و كونسرتێگ ساز بكرداگ ، وه‌لێ وه‌خاتر بارودوخ ئه‌منیه‌وه نه‌توێه‌نستێه بایگه هه‌رێم كوردستان.
كازم ساهر زیاتر ووتێه: گورانیێگ وه‌زوان كوردى ئاماده كردێه ك گورانیێگ كوێه‌نه‌ێ كوردیه و كورده‌یل خوه‌شیان تێه‌ێ له‌لێ و له ئاینده‌ێگ نزیك بڵاوێ كه‌یگه‌وه.
هه‌میش ووتێه: ڕاسه من گورانى وه‌زوان عه‌ره‌بى چڕم ، وه‌لێ كورده‌یل خاس له‌لیم حالى بوون ، چوێن هه‌ردولامان له یه‌ك وڵات ژیه‌یم و هه‌مان ئازار و هه‌ست دێرێم.
له باوه‌ت جیهێشتن (عراق)یش ساهر ووتێه : جێهێشتن عراق وه‌ده‌س خوه‌م نه‌وێه ، به‌ڵكم وه‌هوكار سیاسى وڵاته‌گه‌ێ هیشتگه‌سه‌جی و ئاره‌زوو دێرێ باێگه‌و ئه‌ڕا عراق و بچوگه بان مه‌زار داڵگ و باوگێ.
كازم ساهر له ساڵ 1957 له عراق و پارێزگاێ موسڵ له داڵگ بوێه و له ساڵ 1984 ده‌س كردێه‌سه گورانى چرَین و یه‌كم ئه‌لومێ وه‌ناو (شه‌جه‌رتول زه‌یتون) بڵاو كردێه‌سه‌و.
ج ك