كاریكاتێریست كورد فه‌خره‌دین دووست محه‌مه‌د له چواره‌مین خول كێبڕكێ ناونه‌ته‌وه‌یی كاریكاتێر وڵات رۆمانیا، خه‌ڵات تایبه‌ت و دیپلۆمای شانازی ئی كێبڕكێیه وه‌ده‌سهاورد.
له‌ی كێبڕكێیه ك وه ئاماده‌بوين 117 كاریكاتێریست له 37 وڵات جه‌هانه‌و له وڵات رۆمانیا وه‌ڕێه‌وچی، وڵات ئيران وه 14 كاریكاتێریست له دويای وڵات رۆمانیا زیاترین رێژه‌ی به‌شداربويه‌یل داشت ك له‌ی كێبڕكێیه ئاماده‌بوين و فه‌خره‌دین دووست محه‌مه‌د له شار كرماشان له به‌ش كاریكاتێر بابه‌تدار خه‌ڵات تایبه‌ت كێبڕكێیه‌گه وه‌پێ به‌خشرياس.
ئه‌و به‌رهه‌م كاریكاتێره ك له لایه‌ن ئه‌و كاریكاتێریسته دیزاین كرياويد نيشانده‌ر ئايه‌ميگ مودێرنیته‌س ك زووان ئه‌ڕا ئه‌و خاوه‌ن گرنگی فره‌ێگه، وه‌لی له لایه‌نه ئیتیكییه‌گانه‌و وه ها له شێوازێگ له جويله‌ی نزمه‌وبوين.
له چواره‌مین خول كێبڕكێ ناونه‌ته‌وه‌یی كاریكاتێر URZICENI 2009 وڵات رۆمانیا وڵاته‌يل ئيران وه 14 كاریكاتێریست، ئۆكرانیا وه نۆ كاریكاتێریست، سربیا و بولگاریا وه حه‌فت كاریكاتێریست و چین وه شه‌ش كاریكاتێریست له‌ی كێبڕكێیه وه‌ل يه‌كه‌و ركابه‌ری كرديان.
فه‌خره‌دین دووست محه‌مه‌د ساڵ 1976 هاتگه‌سه دنیا، خاوه‌ن باوه‌ڕنامه‌ی به‌كالۆریۆسه له دیزاین فه‌رش و مافووره‌ی. له ساڵه‌یل گوزه‌يشته له رادیۆ و ته‌له‌ڤیزیۆن ده‌نگ و ره‌نگ ناوه‌ند كرماشان له به‌ش ئه‌نیمه‌یشێن خه‌ریك كار و چالاكی بويه. ماوه‌ی سێ ساڵه وه‌رپرس به‌ش وێنه‌ی فۆتۆگرافی و كاریكاتێری حه‌وزه‌ی هونه‌ری پارێزگای كرماشانه.
ا. ج