وه‌رجله‌يه ده‌نگودوو وازهاوردن شاكر له گورانيچڕين بڵاوه‌وبويد، وه‌لی وه به‌شداریكردنى له فستيڤاڵ (موازین) له مه‌راكش‌و وه‌رجله پێشكه‌شكردن به‌رهه‌مه‌گانى داوا له ئاماده‌بويه‌يل كرد (ئامین) ئه‌را دوعاگانى بكه‌ن، هه‌رچه‌ن ئاماده‌بويه‌يل مه‌مه‌ره‌گه‌ی نه‌‌زانستن وه‌لی جوواو داواكارییه‌گه‌ی دانه‌و.
له‌ناكاوه فه‌زڵ شاكر له وه‌راوه‌ر 30 هه‌زار ئاماده‌بوى فستيڤاڵه‌گه نه‌فره‌ت له (به‌شار ئه‌سه‌د) سه‌رۆك سوریا كرد و وت "خودا به‌شار ئه‌سه‌د له‌ناو بواد، خودا بكوژێده‌ی، ئاماده‌بويه‌یليش وتيان (ئامین)".
ئه‌ى گورانیچڕ لوبنانییه وه‌رجله‌يه‌يش پشتیوانى خوه‌ی ئه‌را خوه‌ینيشانداينه‌يل مه‌ردم سووریا نيشانداويد، يه‌يش كاردانه‌وه‌یگ ئه‌رێنى له‌ناونى هانده‌ره‌يلى له جه‌هان عه‌ره‌ب وه شوين خوه‌ی هاورد.
فره‌تر هانده‌ره‌يل شاكر، ئى هه‌ڵوێستيه به‌رز نرخانن و داوا له هونه‌رمه‌نده‌يل عه‌ره‌ب وه‌گشتى و هونه‌رمه‌نده‌يل سووریا وه تایبه‌تى كردن ك پشتگیرى له شۆڕش ملله‌ت سووریا بكه‌ن.
جى باسه، ئه‌ساڵه نه‌سرى ك خوه‌ی خه‌ڵك سووریاس، یه‌كێگه له‌و گورانیچڕه‌يل عه‌ره‌به ك پشتگیرى خوه‌ی ئه‌را خوه‌ينيشانداينه‌يل مه‌ردم ئه‌و وڵاته ئاشكرا كردويد.
ا. ج