شەفەق نیوز/ دەسەی وەرپرس لە بەشەوکردن خەڵاتەیل فێستیڤاڵ ناودەوڵەتی فیلم ڤێنیز، فیلم براوەی فیلم شیر تەڵایی راگەیان، هەمیش  خاسترین ئەکتەرەیل.

فیلم The Room Next Door کە یەکەم فیلمە وە زوان ئینگلیزی لەلایەن دەرهێنەر ئیسپانی پێدرۆ ئەلمۆدۆڤار، لە فێستیڤاڵ فیلم ڤێنیز خەڵات شیر تەڵایی وەدەس هاورد.

فیلمەگە باس باوەتەیل گەوەرەیگ کەێد، جویر کوشتن وەبەزەیی، و ئاڵشتبوین کەشوهەوا.

خەڵات شیر نوقرە دریا وە فیلم "ڤێرمیگلیۆ"ی دەرهێنەر ئیتاڵی ماورا دیلپیرۆ، کە درامایگ خیزانییە و بیدەنگە و لە کویەی ئەلب لە ئیتاڵیا لە سەردەم جەنگ جەهانی دویەم روی دەێد.

نیکۆڵ کیدمانی خانمە ئەكتەر ئوسترالی خەڵات خاسترین ئەکتەر فێستیڤاڵەگە وەدەس هاورد لەبان ڕۆڵی لە فیلم درامای سووزداری (بەیبی گێرڵ).

ڤینسۆن لیندۆن فەرەنسی خەڵات خاسترین ئەکتەر وەدەس هاورد لەبان ڕۆڵی لە فیلم (The Quiet Sun)دا، کە درامایگ زوان فەرەنسییە و باس لە چیرووک خیزانیگ کەێد کە لەبان تونەڕەوی راسەڕەوی لەیەکتر جیاوە بوود.