وەلێ سوهەیلە سوخانڤاری ئویشێد: ما، رەسینەوەی فراوانیگە ئەرا راسگوی، لە رەفتاریگ تایبەت لە ژیان، لە هویریگ جیاواز، لە ئەجامیگ وەشیوەی خوەد بوود، لە دڵخوەشی وە هویردە چشتەیلد.

سوهەیلە سوخانڤاری خانمە هونەرمەن ئیرانی، وە هونەریگ لە شیوەکاری  و دروسکردن وینەیلی وەشیوەیگ جیاواز، خوازێد میژوو نەتەوەیگ زنی بکەێد، ک لە ساڵ ١٩٧٩ و دویای نزیکەی سێ مانگ لە شوڕش ئیسلامی ئیران، سوهەیلە سوخانڤاری لە نوسینگەی پەرستاری لە مەکتەوە نووەگەی بوی لە بەریتانیا.

 سوهەیلە ئەو مەوقە ژانیگ لە گەیەی داشت، و تەلەفزیۆنە کوینەگە خەوەرەیل بیهوچان بڵاو کەید، و بەڵاچە وەگەرد ناڕەزایەتیەیل ئیران دەێد،  ک هەزاران کەس ناڕەزایەتی لەبان حکومەت نوو ئاخونەیل کردیان، ئیجا مۆسیقایگ وەگەرد ئەو کارەیل تونەڕەویە هاتە گووشی، ک لەو وەختەو، دەنگ مۆسیقا لە هویرمان سوهەیلە وەگەرد رویداوەیل تونەڕەوی گریە بەساد.

باوجی دویای ٤٣ ساڵ، ناڕەزایەتیەیل ئیران جاریگتر گلەو خوارد، و خەوەرەیل کوتپڕ لە گشت جەهان دووارە خەوەر ئیران بڵاو کردن.

لە هەفتەیل دویای کوشتن ژینا ئەمینی، بڕیگتر لە ناڕەزایل کوشیان، لە وەختیگ وڵاتەگە لەبان مافەیل ئاسایی ژن هاتیەسە دەنگ، وەلی ئیجا مۆسیقای"Rebel Rebel" ئەرا ديڤيد بوي هاتە هویرمان سوهەیلە، وە گەرد هاتن یەکەمین ژن ئەرا پۆست سەرۆک وەزیرەیل بەریتانیا.

 ئی پیشانگای وینە لە هۆڵ باربیکان لە لەندەن واز کرد، وەژیر ناونشان Rebel Rebel، ک ریزگردن لە ژنەیل وەرجە شوڕش ئیران هات، ک کاریگەری زیانداریگ لە ناڕەزایەتیەیل ئیسە لە وڵاتەگە پەیا کرد، وە دروسکردن ٢٨ کار هونەری، سوخانڤاری رێز لەو ژنەیلە گرێد ک کەفتنە وەر کوشتن و بڕین و دویرخستن لە کۆمەڵگا.

لە وینەیل پڕ ژیانی، وە هونەریگ فارسی، جویر سازین ئاهەنگیگ ئەرا گیان ویرەدارەیل لە خانمە شاعیر و ئەکتەر و نویسەر و گورانیچڕ، ک دەسگیر کریانە و سزای لەسێدارەدان دریانە، یا ناچار کریانە واز لە ژیان هونەری بارن، ئەوەیش دویای رمیان رژیم پەهلەوی و هاتن رژیم ئاخون.

سوهەیلە سوخانڤاری وە روین دان و چەوسانن چەرم گا، و رەنگەیلی وەگەرد زەردینەی خا تیکەڵ کەێد، وەگەرد چەن تکیک لە سرکە، ک ئەو چشتەیلە لە هونەری وەکار تیارێد، و وینەیلی وە زەنگیانە هەڵڕازنێد، ک ئاهەنگیگ پر لە هیمایی وەو سومبلەیل ژنانە لە ئیران وەرجە شوڕش ئیسلامی سازێد.