شەفەق نیوز- رووژ دوێیم رەشەمە (ئسفەند مانگ) رووژێگە ک وە نام زوان داڵگی یا زوان باوانی دناسرێ.
هەر چەن دە دنیا و دە کوردەواری زوان زگماکی وە نام زوان داڵگی نامگیرەو بییە باوجی دە کوردەواری، زوان باوانی‌یش وەێ دویشن.
دە کشورەێل ناودوئاوان (خاوەرمیانە/ شەرق الاوسط) وه داخەوە زوان داڵگی، ک زوان فەرمی و دەوڵەتی نییە وە خاتر نەداشتن ئامووزێشت و قورپ نەداین دەوڵەتەێلە وە زوان داڵگی، پەسا لە ناوەو ئەڵگیردرێ.
بێ ژە یە پرۆژەێلێ جوور تەعریب دە دەوران بەعس سەددامی و بەعس ئەسەد ئوو تورک‌سازیێ ک لە دەورەێ ئاتاتورک نریاگە یا پانفارسیسمێ ک دە دەوران رزاشا پەهڵەوی دە ئێران بنەڕاێ نریا، سیاسەت دەوڵەت واحد، میللەت واحد ئوو زوان واحد، ک ژێرخوان ئی دەوڵەتەێلە بییە، جوور میراتێ شووم و ماڵ‌ڕمنن، بەش فرەیێگ لە زوان داڵگی کوردەێل و دوفێشتر کوردەێل فەیلی لە بەین بردگە، زوان و بنزارێ ک بەشێ لە میرات مەعنەوی و فەرهەنگی ناودوئاوانە.
هەرچەن هیچ کام لەو بنەڕانەرەێلە نەماگەسەیان، هێمان هیچ کام لەو دەوڵەتەێلە ک نیشتنەسە شوون ئەوان کارێ یا لاوەکەمێ کار فرەیێگ ئەڕا زینگەو کردن زوان داڵگی دە ئامووزێشت و پەروەرێشت دەوڵەتی، چ دە مەدرەسە و چ دە زانکۆوەێلە نەکردنە.