وەڕێه‌وبەره‌یل چوارەمین کێبرکێی ناودەوڵەتی شێوەکاری مقه‌يه‌تيكردن له‌ژینگە(کائۆ) لە وڵات ژاپۆن، تارا عزەتیزادە، تەمەن 13 ساڵەی خه‌ڵك شار گيه‌ڵان له ڕووژئاوای پارێزگای کرماشان، وە شایستەی خەڵاتکردن لەو کێبرکێ هونەرییە دەسنیشانکردن.
تارا تەنها خەڵاتکرياگ بەشداربوی رووژهەڵات کوردستان و ئيرانه لەو کێبڕکێیە، ک لە ژێر ناو "مقه‌يه‌تيكردن له‌سامانەيل سرووشتی وە ده‌سمه‌يه‌ت یەکتری" لە ساڵ 2013 وەڕێه‌وچی. لە شێوەکارییەگەی پیاوه‌يل و ژنه‌يلێگ کيشاويد، ک جنگ کوردی ها وه‌رێيان و لە باخێگ پڕ لە رەنگ، سێفه‌يل قرمز لە دارەگان چنن و لە ناو وێنەی ئەو سێفه‌يلە، ک لە پاێ دارەگان رشيانه لە پەنای گوڵەيل رەنگاوڕه‌نگ، زەوی باخ ئەو شیوەکارە، وە فەرشێگ رەنگی و مه‌يلكيش دەرهاوردگە.
لەهەمانوه‌خت داڵگێگ، ک خەریک چای ڕشاننە و باوگێگ، ک خەریک خواردن ناشتاس، مناڵێگ، ک کتاو خوه‌نێده‌و و بازیکردن مناڵێگ تر لە پەناێ چه‌م ئاوێگ، ڕه‌نگينی فره‌ێگ بەخشاسه ئەو دیمەنە.
کێبرکێی ناودەوڵەتی شێوەکاری ژینگە پارێز کائۆ لە وڵات ژاپۆن، لە چوارەمین خول وەڕێه‌وچينی، وە پێشوازی بەشداربويه‌یل 49 وڵات جه‌هان ،8 هەزار و 516 بەرهەم شێوەکاری ئه‌ڕا وەڕێه‌وبەره‌یل ئەو کێبڕکێیە كلكرياوين.
هەميش لە ساڵ 2011 و لە کێبڕکێ ناودەوڵەتی شێوەکاری مناڵه‌يل و نه‌وجوانه‌يل لە وڵات تورکیا، تارا عزەتیزادە خەڵات نوقره‌يی ئەو کێبڕکێیە وە دەسهاورد.
ا. ج