شەفەق نیوز- وەدۊاکەفتن

دەرهێنەر سینەمایی پیتەر فارێلی وت کە ژیان ئەسارەی ئەمریکی سێلڤێستەر ستالۆن نۊنەرایەتی چیرووک راسگانی ئەرا کەسایەتی بۆکسێنەر "رۆکی بالبوا" کەێد، و ئەوەیش مەوقەی ئامادەبۊنی لە یەکەمین نیشاندان ئەرا فیلم "من رۆڵ رۆکی وازی کەم"، لەناو چالاکییەیل فێستیڤاڵ سینەمایی ناودەوڵەتی تۆرۆنتۆ.

 فیلمەگە چەوخشانیگ کەێد لەبان ئەو چیرووکە کە ها پشت بەرهەمهاوردن زنجیرە فیلمەیل "رۆکی" ناسریاگ، کە لە دەور گەنجیگ لە شار فیلادلفیا خول خوێد کە رۊوەڕۊ رەوشەیل سەختیگ بوود لەڕی وەدیهاوردن خەونەگەی، و ئەوەیش ئەو کەسایەتیەسە کە مەلیۆنەها کەس سەرسام کرد وە تونی و رکداری، و ستالۆن لەبان شاشە وەرجەسەی کرد.

 فارێلی لەڕی فیلمەگەو خوازێد چیرووک "رۆکی" پیشکەش وە دووسەیل کەسایەتی بۆکسێنەرەگە و وە جەماوەریگ نوو و بۊچگتر لە تەمەن بکەێد، کە ئەو سەختییەیلە نەیە کە ستالۆن رۊوەڕۊیان بۊەو وەرجە ئەوەگ ئاڵشت بوود ئەرا یەکیگ لە دیارترین ئەسارەیل سینەما.

 ستالۆن فیلم "رۆکی" نۊسی کە لە ساڵ 1976 دەرچگ، و هەمیش رۆڵ پاڵەوانی لەتی جیوەجی کرد، تا کارەگە دۊاتر بوودە دیاردەیگ فەرهەنگی و یەکیگ لە ناسریاگترین فیلمەیل وەرزشی لە میژوو سینەما.

 فارێلی وت: "چیرووک رۆکی لە راسی چیرووکیگ راسگانیە، رۆکی کەسایەتییگ خەیاڵییە، باوجی چیرووک ستالۆن خود چیرووک رۆکییە".

هەمیش وت: "پەیامەگە یەسە.. هیچ وەخت خوەد وەدەسەو نەیە و هیچ وەخت ملکەچ کەسیگ نەو. نەتۊنریاێد بکڕیەێد. و لەی سەردەمە، گشتی سینیەن، و گشتی وەدۊای پۊل چن، باوجی ئەو ئەوە نەکرد".

 فارێلی وتیش کە ستالۆن، کە تەمەنی رەسێدە 80 ساڵ، فیلمەگە وە تەنیا دی، وە وتنی: "کارەگە هاندەر دڵەڕاوکێ بۊ چۊنکە وە تەنیا دیەی. و یە فیلمیگە خاسترە لە ناوڕاس جەماوەر بۊنیەێد. نەزانستم چۊ قەبووڵی کەێد... باوجی خوەشی لەلی هات، سوپاس ئەرا خودا".

 ستالۆن، وەرجە نیشاندان فیلم "رۆکی"، ئەکتەریگ نەناسریاگ بۊ، و رەت کرد رۆڵ بۆکسێنەرەگە بەێدە کەسیگ تر، وە رکداری لەبان جیوەجیکردن کەسایەتییەگە وەخوەی.

 فیلمەگە ئەرا دە خەڵات ئۆسکار پاڵیاگ بۊ، کە سێ لەلیان بردەو، لە ناویان خەڵات خاسترین فیلم.

 ئەنتۆنی ئیپۆلیتۆ رۆڵ ستالۆن لە فیلم "من رۆڵ رۆکی وازی کەم" رانێد، کە گەشت هونەرمەنە دێرینەگە و رکداری ئەرا ئەوەگ بوودە ئەکتەر بخەێدە ناو جەماوەر، ببجگە دەنگە گڕەگەی و پێکهاتە لەشیە قایمەگەی.

هەمیش فیلمەگە یەکیگ لە ناسریاگترین دیمەنەیل "رۆکی" دووارە وینە گرێدەو، وەختیگ بۆکسێنەرەگە لەڕی جادەیل فیلادلفیاو چوود لە پایان رەسێدە بان پەیژەی مۆزەخانەی فیلادلفیا ئەرا هونەرەیل، لە دیمەنیگ کە ئاڵشت بۊ ئەرا یەکیگ لە ناسریاگترین هێما دیدارییەیل لە میژوو سینەما.