شەفەق نیوز- مودیر عامڵ ئەنجومەن مووسیقی ئێران چگە ماڵ ماموستا عەلیدووس فەلاحەتی دە ئیلام و سەر دا ئەڵەێ.
سابت‌نیا ک دە ئی سەر کیشانە، خودئامووز مودیر فەرهەنگ و ئرشاد ئیلام، وەرد جەواد یەعقووبی مودیر ئەنجومەن مووسیقی ئیلام، وەگەرد میلاد موحەمەدیان شوماڵی خاون فیلم ژیان‌نامەێ ماموستا عەلیدووسیش وەردێ بین، لە هووز موستەنەدسازەێلەێ ماموستا قەدرزانی کرد و وت: ئیمە بایەد کارێ بکەیمن ک سازەێل بنچینەدارێ جوور دوزەلە لە ویرەو نەچن و مەقامات کوانەێ وڵاتەێلەمان تا وە هەێ هە زینگ بمیننەو ک ئەڕا ئی چشتەێلێ جوور فیلمەێل موستەنەد فرە هانایارەو دبن.
ماموستا عەلیدووس ئێسە ساڵدییەترین مووسیقی‌ژەنە دە ئێران ک دە ساڵ 1310 هەتاوی یانێ نزیکەێ نەوەد ساڵ پێش دە ئیلام هاتگەسە دی و هێمان، کڕ داوو و دیارێ، گوڕەێ هناسێ دیاێ ئوو یە پەنجان ساڵە بێ‌هچان دیرێ دوزەلە دژەنێگ و دە وەخت جفتان‌ژەنینیش هەر هەناسەوڕەو نەدبێ.
ئەوی چەن ساڵ پێش لە لایەن بنگەێ وەژین دە مەراسم شەوچلە و یەڵدا، بانگ کریا وە مەریوان و وە خاتر زینگەو کردن بڕێ لە مەقامەێل دوزەلە و خاون شێوازبیین دە سازین ئی سازەلەڵە، رێزداری لەێ کریا.
ئی ماموستا تا ئێسە خەڵات چوارمین دەورەێ سروو و ئاهەنگەێل ئنقڵابی دە ئێران بردگە و دوێیمین خەڵاتی جەژنوارەێ مووسیقی کوردی دە رووژئاوای ئێرانش ئەڕا خوەێ بردگە و چەن جارێ تریش دە فستیواڵەێل تر خڵاتیێ کریاگە.