تونیشا شارما لە تەمەن ٢٠ ساڵان، لە شوین توومارکردن زنجیرەی «عەلی بابا»، رووژ شەممەی گوزەشتە، لە هندستان خوەی کوشت.

شارما یەکیگە لەو ئەسارەیل هونەریە لە ئاسمان بۆلیوود، و مردنی بویە شۆکیگ ئەراک جەماوەر فراوانی.

تونیشا مەوقەی هوچانیگ لە کارەگەی لە توومارکردن زنجیرەی عەلی بابا، چیە حەمام، وەلی وەخت فرەیگ وەپی چگ، تا کەفتنە مینەی، و هەنای پەیای کردن، دوینن لەناو حەمامەگە خوەی داگەسە سێدارە، و بریا خەسەخانە، ولەورا خەوەر مردنی چەسپیا.

فانیتا شارما داڵگ تونیشا شارما، سکاڵا لەبان شیزان خان توومار کرد، ک ئەویش ئەکتەرە و وەگەردی لە خود زنجیرەی عەلی بابا کار کەێد، ک لە بەیاننامەی راگەیانن داڵگ تونیشا وت: شیزان دویەتەگەی وە دڵداری خەڵەتانیە.

داڵگ تونیشا وتیش: شیزان یەکەم جار پەیوەندی وەگەرد دویەتەگەم داشتگە، دویای ئەوە ک پەیمان داگە بخوازێدەی، ئیجا واز لەلی هاورد، ک وەگەرد ژنیگتر بویە، و لە خود وەختەگە وەگەرد تونیشایش بویە، و نزیکەی سێ چوار مانگ وەیجویرە کردیە. 

دویای ئەوە شیزان وە توومەت هاندان لەبان خوەیکوشتن دەسگیر کریا.

راپۆرتەیل نشان دان ک تونیشا وەرجەیەگ خوەی بکوشێد، نان نیمەڕوو لە شوین کارەگە وگەرد خان یاری خواردیە.

شیزان خان ئەرا پولیس شار "ماهاراشترا" وت: لەوەر ناگونجیان ئاینی کۆتایی وە پەیوەندیی وەرد تونیشا هاوردەیە، هەمیش لەوەر جیاوازی تەمەنیان، و خوەی وە هەشت ساڵ لە تونیشا گەورەترە.