شەفەق نیوز/ عەلی ئەشرەف نەوبەتی ناسریاگ وە ''پەرتەو کرماشانی'' شاعر ناودار کورد، ئمڕوو سێشەممە، دۊیاکووچی کرد.
مامووستا پەرتەو کرماشانی لە 29/9/1931 لە کرماشان لەداڵگبۊیە، و یەکیگ لە غەزەلنۊسە ناودیارەیلە، وە هەردگ زوان کوردی و فارسی، و ساڵ 1998 دیوان شیعرەیلی وە ناونشان ''کۊچەباخ'' وە تەقەلای د. محەمەد عەلی سوڵتانی چاپ و بڵاو کریا، ک تا ئیسە چوار جار چاپ کریاگە، و لە هەر چاپیگی بڕیگ شعر لەلی زیای کریاگە.
چەن وتار و لێکۆڵینەوەی ئەکادیمی لەباوەت شعرەیل پەرتەو کرماشانی نۊسیاگە، و لە باوەت غەزەل دۊیای شامی کرماشانی، پێشەنگی شاعرەیل باشوور خوەرهەڵات کوردستانە، و بەشیگ لە شعرەیلی لەلایەن گورانیچڕەیل ناودار ئاواز ئەرایان نریاگە و بۊنەسە گورانی.
نموونەی شعر مامووستا پەرتەو کرماشانی:
ئاواره‌گه‌ی بیچاره‌گه‌ی بیخانمانم ئه‌رمه‌نی
ماڵت نێه‌زانم ها له کوو، ڕووح و ڕه‌وانم ئه‌رمه‌نی
شیرینزوانم ئه‌رمه‌نی، ده‌ردت وه گیانم ئه‌رمه‌نی
ترسم وه‌گه‌ردم تا نه‌که‌ی، بۊیشی بچوو، ده‌ر وا نه‌که‌ی
ئه‌مجا م دی دیوانه‌گه‌ی ئاگر وه‌گیانم ئه‌رمه‌نی
ت باو موسه‌ڵمانی بکه، له‌ی گه‌وره مێمانی بکه
هه‌رچی ک خوه‌ت زانی بکه، من ناتەوانم ئه‌رمه‌نی
بێخود ئه‌ڕا ترسی؟ خوه‌مم، قورسەده‌مم، خاتر چه‌مم
مانگه‌شه‌وه، سایه‌ی خوه‌مه ها شان وه شانم ئه‌رمه‌نی
نەۊش ئه‌وقه‌ره چشتی نییه، ده‌ر وا که بارم که‌فتیه
هه‌ر یه‌ی چکه نه‌زری بکه، ته‌ڕ بوو زوانم ئه‌رمه‌نی
ئه‌ر یه‌ی که‌سی له دشمه‌نی، پرسی یه له کووره سه‌نی
وه گیان هه‌رچی کافره ئۊیشم نێه‌زانم ئه‌رمه‌نی
له خوسه ئاگر گردمه، ڕێ ماڵتان گوم کردمه
ئه‌ر مردمیشم مردمه، مشتی سوخانم ئه‌رمه‌نی
پشتم له بار ده‌رد و خه‌م شکیا، نێززانم چه بکه‌م
ده‌ردم یه‌سه له ماڵ خوه‌م بیخانمانم ئه‌رمه‌نی
ڕووژ و شه‌وم جوور یه‌که، ده‌ر وا که نه‌ومیدم نه‌که
ئاخر وه ناشه‌ڕ تازه م جایڵ و جووانم ئه‌رمه‌نی
ده‌ر وا که زۊتر «په‌رته‌و»ه، میمانه‌گه‌ی ئاخرشه‌وه
یەی شۊشە له‌و به‌دمه‌سه‌وه پڕ که بزانم ئه‌رمه‌نی.