وه گوره‌ێ زانیاریه‌یل به‌همه‌ن قوبادی هاوكاری مارك ئادامز ڕه‌خنه‌گر ناوده‌وڵه‌تی سینه‌ما له وڵات به‌ریتانیا و كیم یۆتانی ڕووژنامه‌نويس و ڕه‌خنه‌گر و كیم كارتاڵ ڕه‌خنه‌گر جوور لیژنه‌ی دادوه‌ری هه‌فته‌مین فستیڤاڵ ناوده‌وڵه‌تی فيلم ئۆف پله‌س كامێرا كرد.
جی باسه فستیفاڵ ئۆف پله‌س كامێرا یه‌كێگه له فستیڤاڵه‌يل سینه‌مایی وڵات پۆڵه‌ندا ك له ساڵ 2008 ئه‌ڕا یه‌كه‌مین جار له شار كراكۆفی كويه‌نترین شار وڵات پۆڵه‌ندا وه‌ڕێه‌وچی، له‌ی فستیڤاڵه 10 فيلم ناودار كێبركێ كه‌ن ئه‌ڕا بردنه‌وه‌ی زیاتر له 100 هه‌زار زیلۆت پۆڵه‌ندی.
هه‌فته‌مین خول ئی فستیڤاڵه وه به‌شداری فیلم بڕێگ له وڵاته‌یل جووراوجوور جه‌هان له به‌شه‌یل پێشبڕكێ و ده‌یشت پێشبڕكێ، له‌وانه: به‌ش تایبه‌ت، به‌ش ژینگه پارێزی، به‌ش مناڵه‌يل، به‌ش پێشبڕكێ سه‌ره‌كی، به‌ش به‌هره‌مه‌نده‌يل و هه‌ميش به‌ش فیلمه‌يل دريژ پۆڵه‌ندا، له 2ی ئایار ده‌س وه كاره‌یلی كردو تا 11ی مانگ دريژه‌كيشێ.
ا. ج