یەێ راوچیێ، پەلەوەرێ خسە داو، پەلەوەر وەتە پێ : ئەی پیای حساوی ! تو وە ناو ئی ئمردە ئی هەمگە گووشت پەس و گا خواردیدە و هەرگز سێر نەۊدە، لە خواردن جەستەی بۊچگ منیش سێر نیەۊد، ئەر م وڵ بکەی، سێ پەن یا ئامووژگاری وەلیفەتدار ئەڕاد ئۊشم تا وە کامەرانی و بەختەوەری بڕەسی.
پەن یا ئامووژگاری یەکم دەمەێ دەسد ئەر ئازادم بکەی پەن دویم وەختێ بنیشمە بان ماڵەگەد، پەن سێم وەختێ ئۊشمەێ بنیشمە گژ ئەو دارە.
پیاگەیش وەت گیچەڵێ نییە منیش هەتامە (قبولم است) ئی مەرجە، پەلەوەر وەت : پەن یەکم یەسە ک قسەی دروو لە کەسی باوەڕ نەکە، پیاگە زۊزی ئازادێ کرد پەلەوەریش نیشتە بان خانگ پیاگە.
وەت پەن دویم یەسە ک هەرگز خەم و خوسەی ویەردە نەخوە، چشتێ ک لە کیس دایدە حسرەتێ نەخوە.
پەلەوەرە باڵگرد نیشتە بان پەل دارەگەو وەت : ئەی رێزدار ! وەناو زگم مرواری گران قیمەتێ هەس ک کێش یا وەزنێ دە درەمە ئەمانێ وەداخەوا رووژێ و نسیو خوەدو مناڵەیلەد نەۊ.
وەگەنە وە پۊلەی دەوڵەمەن و بەختەوەرا بیاتیاین.
پیاێ راوچی لە شنەفتن ئی قسە فرە ناڕەحەت بی و ئاخ و هەناسێ هەڵکیشا.
پەلەوەر وە لێوەخەنەێگا وەتە پێ : مەر ئامووژگارید نەکردم ک حسرەت ویەردە نەخوە ؟
ئایا پەنەیلێ ک وەتم لە لیان نەڕەسیدا یا ناشنەوای؟ پەن دویم یە بی ک قسەێ نەپوور باوەڕ نەکەی، ئەی سائەقڵ ! کێش یا وەزن م گردو گنیلک سێ درەم فرەتر نییە ، چۊ پووڕێ ک یەێ مرواری دە درەمی وە ناو زگم بوو ؟
پیاگە چرچێ بردەێ و وەت : ئەی پەلەوەر دانا پەنەیل تو فرە گران قیمەتن. پەن سێمیش ئەڕام بۊش.
پەلەوەر وەت : ئایا تو وەو د پەن وەرینە ک وەتم ئەمەڵ کردی ک پەن سێم ئەڕاد بۊشم .
پەن وەتن وە ئایەم نەزان و نادانێ ک چەوێ ها خەوا مێنێدە یەگ تۊەم بپشنیدە ناو زەۊ شوورەکات.