شەفەق نیوز/ وەچەودیەیلیگ لە هەولێر پایتەخت هەرێم کوردستان، ئمڕوو سێشەممە، خەوەردان ک یەکیگ لە وەناوبانگترین دەریاچەیل پارێزگاگە، ک گەشتیارەیل لە وەرزەیل زمسان و وەهار رۊی وەپی کەن، هشکیەگە کردیەسەی پارچەی هشکیگ لەناو کۊیەیلە.
وەچەودیەیلە ئەرا ئاژانس شەفەق نیوز وتن: دەریاچەی فیلاو لە قەزای چۆمان باکوور هەولێر، لەوەر بیئاویەگە و کەم وارانیەگە ک هەرێم کوردستان و عراق لەی ساڵە وەخوەی دی وەتەواوی هشکەو بۊیە.
وەگورەی وەچەودیەیلە؛ یە یەکەم جارە ئی دەریاچە ک گەشتیارەیلە لە وەرزەیل زمسان و وەهار وەخاتر ڕەنگینی سرووشتەگەی رۊی وەپی کەن هشکەو بۊیە.
دەریاچەگە کەفێدە ناوبەین زنجیرەی کۊیەیلەی قەزای چۆمان باوجی دەزگای گەشتوگوزاری لە هەرێم کوردستان، لە گرنگی هشکەوبۊن دەریاچەگە کەمەو کرد، چۊنکە گەشتیارەیلە وەگشتی لە وەرز تاوسان رۊی وەرەو ئەو دەریاچە نێکەن، و لە زمسانیش ئاوەگەی گلەو خوەێد.
نادر روستی قسەکەر دەزگاگە ئەرا ئاژانس شەفەق نیوز وت: یە لەوەر هشکەساڵیەگە بۊی، باوجی گەشتیارەیلە لە وەرز تاوسان رۊی وەرەو ئی ناوچەیلە نێکەن، بەڵکم تەنیا لەو وەرزەیلە وەخاتر ڕەنگینی سرووشتەگە لەو ناوچەیلە رۊی وەرەو پی کەن.