خودا رووزی رەسنە

پیای سادەیگ هەمیشە ژنەفتۊ ک خودای گەورا دەستەوەر ڕووزی بەنەیلێیە و ڕووزی گشتێیان ڕەسنێد، هەر وە ئێ مدووە، کەفتە هزر یەگ بچوودە ناو مزگەفتێگ و عێبادەت و بەندەگی خودا بکەێد و ڕووزی خوەی لە لێ بسێنێد.

یەی ڕووژ لە گوڵ سووا چێیە مزگەفت و خەریک عێبادەت بۊ..

هەگ بۊە نیمەروو، لە خودا داوای نان نیمەڕوو کرد! ئەمان هەرچێ وسا هۊچ ئەڕای نەڕەسێ، تا شەوا هات، دجارە لە خودا داوای خواردەمەنی کرد و چەوەڕێ وسا..

قەیرێگ لە شەو وێیەرد ک دەوریشێگ هاتە ناو مزگەفتەگە و لە پای ستۊنێگ نیشت و شەمێگ دەم دا و لە ناو تۊرەگەی خوەی نان و پڵاوێگ دراورد و دەس کردە خواردن..

پیای ک لە شەوەکیەو وە زگ ورسێ مەنۊد و چەوێ وە نان خواردن دەوریش بۊ، دی ک دەوریش کوتێگ لە چێشتەگەی خوارد و نزیکە ئەودۊایێش بخوەێد، لە ناکاوا قوتان.. دەوریش ک دەنگ قوتەی پیای ژنەفت، وەت:

کیید؟ بەو وەر

پیای کە لە ورسی لەپسا لەرزیاد هاتەو وەر و نیشتە سەر سفرەی دەوریش و دەس کردە خواردن، هەنای تێر بۊ حەکاتی خوەی ئەڕا دەوریش وەت..

دەوریش وەتە پێ:

ئەگەر ت نەقوتانیاید، م لە کوورە بزانسیام هایدە ئێرە، دروسە خودا ڕووزی ڕەسنە ئەمان یەی قوتەیگیش بایەس بکەید!

هەڵگەردان و نۊسان: ژیوا