شهفهق نیوز- هاده‌ێ وه ژنه‌فتن نام ئهنار گشت بکه‌فیمنه ویر شار ساوه، یا یه‌زد یا چووزانمیمن ئه‌ورامانات.
خاسه بزانن ک گه‌پترین کووئه‌نارستان ئێران ک ده یه‌ک گوڵ جی کوو‌م‌ئه‌ڵاتگه، ئه‌نارستان شار کۋێیه‌شت یا کوهده‌شته ک ها ده له‌کستان ده لا ژۆر لۆڕستان.
له ئی ئه‌نارستان دو هزار و شه‌شسه‌د هکتارییه، چل تا چل و په‌نج ئهنار ده هه‌ر هکتارێ ئه‌ڵگرن ک وه نام ئهنار ته‌نگ ئه‌فراسیاو ، نامگیر بییه و وه فره کشوه‌ره‌یلیش کلێ دکه‌ن.
ئهنار، ده لای ئێرانییه‌یل و کورده‌یل، میوه‌یێگه به‌هه‌شتییه ک هه‌میشه وه‌هه‌رز و گران بییه و هه‌ر ساڵ جه‌شن فره ئه‌ڔا ئهنار ئه‌‌ڵگرتن دگرن ک دیاری‌ترینه‌یان جه‌شن هه‌نار هه‌ورامانه.
ده نام کورده‌یل فه‌یلییش، ده ئیلام، ئهنار، وه هن (بێ فاتمه‌ی زارا -س-) دناسنه‌ێ و نه‌دهیلن دانێ له‌ییش بکه‌فێگه زه‌مین و به‌تره‌ف ببێ.
هه‌ر چێ وه‌ر ئه‌و شه‌و یه‌ڵدا دچیمن ک ئاخر پاییز و سه‌رده‌واسه، چوون ئهنار و شامی ک هن مه‌راسم ئی شه‌وه‌نه و گشت وڵات دسیننه‌یان، ئهنار قورپ فێشترێ دگرێ و ئێسه‌یش ئه‌وقه‌ره گرانه‌و بییه ک هاده‌ێ ئمساڵ له بان سفره و خوانچه‌ی شه‌و یه‌ڵدا فڕ بگرێ.
چه‌ن رووژ پێش، ره‌ییس عه‌لوه‌یل میوه‌و ته‌ڕه‌بار ئێران ده جواو ئه‌ڵقیڕانن و ئه‌ڵته‌‌ژیان وڵات له گرانی ئهنار، وت: ئهنار هه گرانه و کارێ له ده‌س که‌سێ ئه‌ڵنه‌یاێ و مه‌ردم ئه‌ر نه‌دیرن، ئه‌ناریش نه‌سینن.
بڕێ له فه‌رهه‌نگ‌دووسه‌یل ئێرانی دڵه‌وڕه و وڕینه‌ی یه دیرن ک هاتێ گرانی، فره له‌ی ئائیننه‌یل چه‌ن هزار ساڵه جوور جه‌ژن هه‌نار و شه‌و یه‌ڵدا یا شه‌و چله له ناوه ئه‌ڵبگرێ.