شەفەق نیوز/ پارێزگاری کرماشان لە خوەرهەڵات کوردستان، ک پارێزگایگ فرە رەنگ و فرە ئایینە، لە چین مێژوو، کولتوور و شارستانییەت، هەرلیوا خوراد و خوەراکیش شاریگ دەوڵەمەنە. 

لە چەن رووژیگ گوزەیشتە، شار کرماشان، لەلایەن ڕێکخراو یۆنسکۆ سەروە نەتەوە یەکگرتگەیل لە رز شارە داهێنەرەیلە لە چین پیخوەر و خوەراک و لە ئاست جیهان توومار کریاگە.    

ئەو بڕیار یۆنسکۆ لەوەر ئەوە دریاگە ک لە کرماشان 80 جۊر پیخوەر خوەراک، 11 جۊر نان، 20 جۊر شیرینیی هەس ک چەن خوەراک و شیرینیی ناسریاگە لەبکرماشان، جۊر: "شەلەم، تەرخینە، ئاش، ئاوگوشت، شۆروا، کەلانە، شلکێنە، کولێرە، نان برنجی، کاک، کەباب دەندە، رۊین خۆماڵی و خورشت خەلال". 

لە ساڵەیل گوزەیشتەیش یۆنسکۆ شار سلێمانیی جۊر شاری داهێنەری ئەدەب و شاریسنەشی جۊر شاری داهێنەری مۆسیقا ناسانیە.