شەفەق نیوز/ گەنجیگ چینی وەناو لیو چوانێی ٢٢ ساڵان، سێ رووژ لە بن بیریگ کوینە وە قویلایی ١٢ مەتر مەن.

دیار نییە چوین لیو رەسیەسە دارستانیک لەبان سنوور ناوەین تایلاند و میانمار، وەلێ وەناکاوەو کەفتە ناو بیریگ کوینە.

لە کەفتنەگە مەچگی شکیا، و سەری زوور دیە، و هاز وەپیەو نەمەنیە تا تەقەلا بەێد لەناو ئەو بیرە باێدە دەیشت، کە لە هاوار زیاتر چارەیگ نەیاشت، وەلێ هاوار فرەیش هاتێ هازی بووڕێد، ئەراوە دویای هەر هوچانیگ هاواریگ کردیاد.

ئەوە خاسە کە دەنگ هاواری رەسیە گووش مەردم ئاوایەیل، وەلێ رخیان لەو دەنگە چگە، کە وتنە یە دەنگ گیرستن فریشتەی ناو دارستانە، کە لە رخەو لەو ناوە دویرەو کەفتن، ئەویش لە وەرسگی و تەنیایی لەبن ئەو بیرە هەر هاوار کەێد.

خوەشبەختانە، کابرایگ پەیوەندی وە پولیس کرد، و ئاگاداریان لەبان ئەو دەنگ هاوارە کرد کە لە دارستانەو تیەێد، تا پولیس زویوەزوی رەسیە شوینەگە و دەسکردە وەشکین وەمینەی سەرچەوەی ئەو دەنگە، و بیر کوینەیگ پەیا کرد، کە لیو لەناوی گیر هاتیە.

نیم ساعەت وەپی چگ تا ئەو گەنج شەکەتە لە بن بیرەگە رزگار بکەن، کە فرە لەڕەو بویە، و هاز لە لەشی نەمەنیە.