شەفەق نیوز - وەدۊاچگن

لە سای ئاڵووزییەیل ئەمنی و ناڕەزاییەیل کە چەن شاریگ فەرەنسی وەخوەیانەو دوینن، پرسیارەیل هاتنە بان لەباوەت توانای وەڕیەوچگن بازی تووپان بەرشەلۆنە و پاریس سان جێرمان لە خول پاڵەوانەیل کە جەماوەرەیل تووپان وە گرنگی فرەیگەو چەوڕیی کەن.

 هەردوگ تیمەگە، رووژ سێشەممە، لە یاریگای "پارک دی پرانس" لە پاریس پایتەخت فەرەنسی یەکەو گرن، لەناو گەردین سێیەم لە قۆناغ خولەگە لە پاڵەوانیەتی ئەوروپی.

رویوەڕویبۊنەگە گرنگییگ گەپ وەدەس تیەرێد، دۊای ئەوە کە هەردوگ تیمەگە شەش خاڵ ئەرا هەر یەکیگیان چنین وەشوین سەرکەفتنیان لە یەکەم دوو گەردین، ئەوەگ هیلێد یەکەوگردنەگە بوودە رویوەڕویبۊنیگ راسەوخۆ ئەرا وەهیزکردن شوینەیلیان لە پیشەنگی خشتەی رزبەنی.

 بەرشەلۆنە خوەی ئامادە کەێد ئەرا گەشتکردن وەرەو پاریس، کە لە ماوەی پشوو کۆتایی هەفتە ناڕەزاییەیل فراوانیگ وەخوەی دی کە رویوەڕویبۊنەیل و کارەیل ئاژاوە لەناوی بۊ، لە وەختیگ دەسەڵاتەیل فەرەنسی تەقەلا دەن ئەرا کۆنترۆڵکردن ئاڵووزییەیل و ئارامکردن ناوچە زینگەیل.

 وەگەرد ئی پیشهاتەیلە، تا ئیسە نیشانەیگ لەبان دۊاخستن بازیەگە راگەیان نەکریایە، چۊنکە بەرشەلۆنە وەردەوامە لە ئامادەکارییەیل خوەی وەپەی بەرنامەی دیاریکریاگ، لەناو رویکردنیگ ئەرا وەڕیەوچگن یەکەوگردنەگە لە وەخت بڕیارلیدریاگ خوەی.

 وەپەی ئەوە کە رووژنامەی "مۆندۆ دیپۆرتیڤۆ" ئیسپانی باسی کرد، بەرشەلۆنە پلان دانەێد ئەرا گەشتکردن وەرەو فەرەنسا وە شیوەیگ ئاسایی، وەبی خستنەڕوی وژاردەی دۊاخستن رویوەڕویبۊنەگە تا ئیسە، لە سای وەردەوامبۊن ئامادەکارییە هونەری و رێکخستنەیل ئەرا بازیەگە.