شەفەق نیوز- وەدۊاچگن

ملیاردێر ئەمریکی ئیلۆن ماسک نەخشە کیشێد ئەرا دروسکردن کارگەیگ گەپ ئەرا بەرهەمهاوردن نیمچەئەسنەیل لە ویلایەت تەکساس، وە رووبەریگ کە رەسێدە 9.3 ملیۆن مەتر چوارگووشە، لە پرۆژەیگ کە هەردوگ کۆمپانیای "تێسلا" و "سپەیس ئێکس" گرەو لەبانی کەن ئەرا پڕەوکردن هەوەجەی رووژوەرووژ زیاتربۊیان لە چیپەیل و توانایەیل ژمێرکاری گریەدریاگ وە زیرەکی دەسکرد.

هەردوگ کۆمپانیای "تێسلا" و "سپەیس ئێکس" نیاز دیرن کارگەی "تێرافاب" لە کەرت گرایمز لە ویلایەت تەکساس دروس بکەن، تا لەژیر یەک قەواسەی پرۆسەیل دروستردن چیپەیل و پارچەیل هویرگە، لەشان پیچانن پیشکەفتگ و تاقیکردن گردەو بکەێد.

 وەپای زانیارییە سەرەتاییەیل، بەهای بەرهەمهاوردن لە قۆناغ یەکەم لە پرۆژەگە رەسێدە زیاتر لە 16.8 ملیار دۆلار، وەگەرد چەوەڕیکردنەیل وە ئەوەگ بەهای پرۆژەگە هەگ تەواو بوود بڕەسێدە نزیکەی 120 ملیار دۆلار، لە وەختیگ نزیکەی 3 هەزار دەرفەت کار دابین کەێد.

 ماسک، لە بڵاوکریاییگ لەبان سەکوو "ئێکس"، وت، کە هەردوگ کۆمپانیاگەی ئامادەکاری کەن ئەرا دەسکرن وە دروسکردن "گەوراترین پرۆژە ئەرا دروسکردن چیپەیل"، کە ناوەین لۆژیک و هویرگە و پیچانن پیشکەفتگ لەژێر یەک خانگ گردەو کەێد، وە ئامانج بەرهەمهاوردن چیپەیل زیرەکی دەسکرد لەبان ئاستیگ فراوان ئەرا وەکارهاوردنەیل زەمینی و ئاسمانی.

پرۆژەی "تێرافاب" لەبان رووبەریگ دریژەو بوود کە رەسێدە نزیکەی 9.3 ملیۆن مەتر چوارگووشە، یانی ئەوەگ یەکسانە وە زیاتر لە 100 ملیۆن پای چوارگووشە، کە ئەگەر جیوەجی بوود، وە جیاوازییگ فرە گەوراتر بوود لە ناوەند "نیو سینچری گڵۆباڵ سەنتەر" لە شار چێنگدۆی چینی، کە رووبەرەگەی رەسێدە نزیکەی 1.76 ملیۆن مەتر چوارگووشە.

 یەیش رووبەر دامەزراوەگەی ماسک زیاتر لە پەنج ئەوەنەی رووبەر بینا چینیەگە بوود کە وە یەکیگ لە گەوراترین بینایەیل لە جەهان هەژمار کریەێد.

تەمەیل پرۆژەگە تەنیا لەبان دروسکردن چیپەیل نووسیاس، کە ئامانج رەسین وە توانایگ بەرهەمهاور دیرێد کە بتۊنێد پاڵپشتی زیاتر لە یەک تێراوات لە هاز ژمێرکاری ساڵانە بکەێد، ئەرا دابینکردن هەوەجەی کۆمپانیایەیل ماسک کە رووژوەرووژ زیاتر بوون لە چارەسەرکەرەیل و توانایەیل ژمێرکاری.

 چەوەڕی کریەێد ئەو چیپەیلە کە لە کارگەگە بەرهەم تیەن لە ماشینەیل "تێسلا" وەکار باریەن، وەگەرد رۆبۆتەیل "ئۆپتیمۆس"، و ژیرخان ژمێرکاری و ئاسمانی سەر وە "سپەیس ئێکس".

 پرۆژەگە لە وەختیگ تیەێد کە هەوەجەی کۆمپانیایەیل تەکنەلۆژیا ئەرا نیمچەڕەسنەیل فرەو بوود، وەگەرد ئەو بازدان زویوەزویە کە لە بەرنامەیل زیرەکی دەسکرد و ماشینەیل خوەیئاژوو و رۆبۆتەیل دیرن.

 کۆمپانیایەیل ماسک لەڕی "تێرافاب" تەقەلا دەن پشت بەسانیان وە دابینکەرەیل چیپەیل دەیشتەکی کەمەو بکەن، و کۆنتڕۆڵیگ گەوراتر بەنە گرووپەگە لەبان زنجیرەی بەرهەمهاوردن، لە دەسکردن وە دروسکردن پارچەیل تا رەسێدە پیچانن و تاقیکردن.

 ئی تەواوکارییە، لە ئەگەر سەرکەفتنی، تۊنێد توانایگ گەوراتر بەێدە کۆمپانیایەیل ماسک ئەرا کۆنتڕۆڵکردن لەبان خەرج بەرهەمهاوردن و زنجیرەیل دابینکردن، لەشان کەمەوکردن رخبارییەیل کەموکوڵی لە چیپەیل یا ئاڵووزییەیل دابینکردن.

 ماڵپەڕەگە توانای بەرهەمهاوردن ئایندەیی ئەرا پرۆژەگە بەسێدەو وە نەخشەیل فراوانتر کە بەرهەمهاوردن ئەوەگ رەسێدە ملیۆنیگ رۆبۆت لە جۊر "تێسلا ئۆپتیمۆس" لەخوەی گرێد، وەگەرد رەوانەکردن ئەوەگ رەسێدە 10 ملیۆن تەن لە کاڵا ئەرا ئاسمان ساڵانە، لەشان زیاتر لە یەک تێراوات لە وزەی خوەر.

 "سپەیس ئێکس" نیاز تەیرێد تەواو خەرج پرۆژەگە وە تەنیا بگرێدە خوەی، چۊنکە کۆمپانیای "تێرافاب" هەشت داواکاری پیشکەش کردگە ئەرا وەرگردن هاندەرەیل باجی ئەرا دوو ناوچەی فێرکاری ناوخۆیی، لەناو بەرنامەی "تیجی" لە تەکساس.

 کۆمپانیاگە تەقەلا دەێد، لەڕی داواکارییەیلەو، بنەمای ئەو بەها دیاری بکەێد کە وەپای ئەو ریژەیگ لە باجەیل ماڵداری مەکتەوی ئەرا ماوەی دە ساڵ لە هەر گامیگ لە گامەیل پرۆژەگە هەژمار کریەێد.

 کۆمپانیاگە دیاری کرد کە نەوین ئی هاندەرەیل شایەت بوودە مدوو داوەزیان داهات لەبان بەرهەمهاوردن لە کەمترین ئاست داواکریاگ،  وتیش کە ویلایەتەیل رکابەر، لەناویان ئەریزۆنا، شایەت مەرجەیل ئابووری گونجیاگتر پیشکەش بکەن.

 وەپای داواکارییە پیشکەشکریاگەیل، دەس نەکەفتن ئی هاندەرەیلە تۊنست گاڵ کۆمپانیاگەو بیەێد ئەرا ئاڵشتکردن پرۆژەگە ئەرا دەیشت تەکساس.

لە وەرانوەر ئەوە، دەسەڵاتەیل ویلایەتەگە ئامادەیی خوەیان ئەرا پشتیوانیکردن پرۆژەگە نیشان دان، چۊنکە تەکساس وەخششیگ وە بەهای 30 ملیۆن دۆلار لە سندووق تەکساس ئەرا پرۆژەیل دا وە کۆمپانیای "سپەیس ئێکس".

 دوسەڵاتدار ویلایەتەگە وت کە تەکساس "ئەو شوینەس کە هۊرە گەورەیل لەناوی گەشە کەن تا گەوراتر بوون"، و باس "تێرافاب" وە دامەزراوەیگ بیوینە کرد کە تۊنێد بەرهەمهاوردن چیپە ئەلکترۆنییەیل زویترەو بکەێد و هەزاران کار دابین بکەێد.

 پرۆژەی "تێرافاب" لە سای پشت بەسانن پیشەسازی تەکنەلۆژیای ناودەوڵەتی وە شمارەیگ دیاریکریاگ لە کۆمپانیایەیل و ناوچە جوگرافییەیل لە بەرهەمهاوردن نیمچەڕەسنەیل تیەێد، و لە سەرەتایان کۆمپانیایەیل ئاسیایی.

 کۆمپانیایەیل ماسک گرەو لەبان ئەوە کەن کە بەرهەمهاوردن چیپەیل وە ناوخۆیی توانایگ گەوراتر وەپیان دەێد ئەرا رۊوەڕۊبۊن ئاڵووزییەیل دابینکردن ناودەوڵەتی، وە تایبەت وەگەرد بەرزەوبۊن داواکاری لەبان ئەو چارەسەرکەرەیلە کە لە زیرەکی دەسکرد و رۆبۆتەیل و ماشینەیل و سیستەمەیل ئاسمانی وەکار تیەن.

 وە یەوە "تێرافاب" تەنیا کارگەیگ نوو لەناو سامانەیل "تێسلا" و "سپەیس ئێکس" نوێنەرایەتی نیەکێد، بەڵکم تەقەلایگە ئەرا دروسکردن بەشیگ بنەڕەتی لە ژیرخان ژمێرکاری کە ئیمپراتۆریەت ماسک لەماوەی ساڵەیل ئایندە هەوەجەی دیرێد، وەگەرد هاوردن بەشیگ فرە لە زنجیرەی دروسکردن چیپەیل ئەرا ناو ویلایەتە یەکگرتگەیل.