شەفەق نیوز/ رۆژنامەی «دەیلی مایڵ» لە زوان کابرای پۆلیسیگ لە لۆس ئانجلوس نووسان: ک باوەتیگ فرە نهێنی لە فەرمانگەی پۆلیس هەس ک توومەتبار رۆبرت کنیدی «بۆبی» برای سەرۆک کووچکردگ جۆن کنیدی وە کوشتن مارلین مۆنڕۆ کەێد، و گوایە ئەکتەر «پیتەر لوفۆرد» وتگە ک خوەی تاوانەگە وەچەو دیە.
ک وەرجە یاد پەیابوین سەرۆک کنیدی لە ئایار ١٩٦٢، مۆنڕۆ لە پەخش زندەیگ لە بان تەلەفزیۆن لە باخچەی مەیدان مادیسۆن دەرچگ، و ودەورمل خورییگ داگە لوفۆورد و لە پشت مایکریفۆنەگە وە دڵنگ چەرمیگ بڕ لە میرگ وە شیوەی نیمچە رویتیگ وسیا، و گورانی پیرووزبایی ساڵ پەیابوین ئەرا سەرۆک چڕێ.
دویاترین سەما
لە ئاهەنگیگ تر لەو شەوە، لە شوقەیگ سەروە خاوەن یەکیگ لە ستدیۆیل هۆڵیوود، مارلین مۆنڕۆ وەگەرد بۆبی کنیدی سەما کرد، ک ئەو مەوقە وەزیر داد بوی، باوجی مۆنڕۆ وەرد سەرۆک کنیدی وە رییگ ژیر زەوی و پاچینەیگ تایبەت دەرچگ، تا رەسیە شوقەگەی لە هوتێل کاریلایل.
ئەرا ئی رووژەگەی تر، مۆنڕۆ وەرەو ولایەت کالیفۆرنیا گلەو خوارد، و لۆفۆورد ک شوی خوەشک سەرۆک کنیدی بوی پەیوەندی وە مۆنڕۆ کرد، تا وەپی بویشێد دی پەیوەندی وەگەرد وەزیرەگە وهەمیش وەگەرد سەرۆک نەکەێد، و دویای ئەوە وە سێ مانگ مۆنڕۆ مرد، و لێکۆڵینەوەیگ ئاشکرای خوەیکوشتنی کرد، وەلی وە دریژایی ٦٠ ساڵ فرە کەس وتن کوشیاگە.
نووش ژهەرین
دەیلی مایڵ وتیش: ئەو کابرای پۆلیسە لە لۆس ئەنجلوس بڕیار دا راسیەگە ئاشکرا بکەێد، ک هالە ناو بەڵگەنامەیلیگ لە ئەرشیف فەرمانگەی پۆلیس لۆس ئەنجلوس، ک نشان دەن گوایە مۆنڕۆ وەخاتر مقەیەتیکردن بنەماڵەی کنیدی کوشیاگە، و گوایە خود بۆبی ئەو نووش ژەهرینە داگەسە دەرخوارد مۆنڕۆ تا لە وەرچەو لۆفۆورد بکوشێدەی.
روسمیلەر ئویشێد: دویای ٢٠ ساڵ راسیەگە لە ڕوی لوفۆورد وتگە، و ئەویش ئاشکرای کردگە، وەلێ تا ماوەی ٤٠ ساڵ باوەتەگە شاریاوە.
و ئەو پۆلیسە تا ٤٠ ساڵ لە رخەو بی دەنگ خوەی کرد، ک گەورەیل پۆلیسەیل ئەو سەردەمە لەبان ژیان بوین و توانای هەڕەشەی خوەی و خیزانەگەی داشتن.
ئیسەیشە بڕیار دا لەڕی کتاویگ وەناونشان (بومب) خەوەردار جهان لە شەو کوشتن مارلین مۆنڕۆ وەدەس بۆبی کنیدی بکەێد.