هەرچەن بڕیار دیاریکردن  رووژ جەهانی چای لەی  دواییە بویە، ک لە ساڵ ٢٠١٩ وە بڕیار نەتەوە یەکگرتگەیل پەسەن کریا، بەڵام ئاهەنگکردن وەی نووشینە چوودەو ئەرا چەند ساڵیگ وەرجە ئەوە، ک لە ساڵ ٢٠٠٥ وڵاتەیل بەرهەمکەر چای لە رووژیگ  ئاهەنگ  ئەرا ئی بەرهەمە دیاری کردن لە گشت ١٥ی کانوون دویەم هەر ساڵیگ.  

بەنگلادیش، سریلانکا، نیپاڵ، ڤێتنام، ئەندەنوسیا، کینیا، مالاوی، مالیزیا، ئۆگاندا، هیندستان و تانزانیا ئەرا کیشانن نووڕین حکومەت و تاکە کەس ئەرا کاریگەری جەهانی بازرگانی چای لەبان کراکار  و جفتیار و  ئەرا پشتگیریکردن ئی رووژە و ئەرا قایمکردن نرخەگەی.

 بەرژەوەنی جەهانی ئەرا چای زیای کردگە، چوینکە کاڵینی بویەسە سەرچەوەی ژیان ملیۆنا خیزان.

یەیش بیجگە لە سوودەیلی ئەرا  تەندروسی، وەو مادەیلە ک هاناوی، جویر پۆلیفینۆل، ک دژە هەوکردن و ئۆکسێنەرە، لە خود وەختەگە  دەسمیەتی ئەرا داوەزین کیش دەێد، هەرلیوا چای مادەی فلاڤۆنۆید هاناوی، ک سوود ئەرا  تەندروسی دڵ دیرێد، هەمیش دەسمیەتی دەێد لە کەمکردن رخ تویشبوین وە بیماریەیل دڵ، هەمیش چای دەسمیەتی ئەرا خاسترکردن هووش دەێد چوینکە کافایین هاناوی.

 بیجگە سوود دارایی و تەندروسی چای ئەرا مەردم، چای سوودیگ کۆمەڵایەتی دیرێد، ک چای بوودە ئەو دەسپیچگە تا چەن کەسیگ وەیەکەو بنیشن و باسیگ بکەن، و یەکتر بناسن.

فرەترین مەردم ناوچەیل ئیمە شەوەکیان چای نووشن، وەگەرد ناشتا، ئەراوە، هەر تاکە کەسیگ هەنای بوو چای کەێد، کوتەپڕ یاد تاشتایل مناڵی، و یاد داڵگ و باوگ و برا و خوەشک کەێد، و بڕیگیش یاد شوینیگ کەن ک فرەجار لەو شوینە چای نووشینە، و هەمیش گشتمان زانیمن، ک پیشکەشکردن چای خاسیگ، خاسترین چشتە ئەرا میوانەیل، و ئەگەر میوانیگ چای نەخوارد، دی خاوەن ماڵ زانێد ک نان نەخواردیە.

بڕیگ لە پیاوەیل و گەنجەیل فرە وەختیان لەناو چایخانەیل وەسەر بەن، ئەوەیش نەگ تەنیا ئەرا پیاڵە چایەگە، بەڵام تا چەویان بکەفێدە چەن کەسیگ، و چەن قسە و باسیگ بکەن، و هەمیشە باسەگە وەگەرد زڕنگەی پیاڵە خوەشترەو بوود.