شەفەق نیوز - وەدۊاچگن

ئەسارەی ئەرجەنتینی لیۆنێل میسی، بازیکەر ئینتەر میامی، دەسکەفتیگ میژوویی وەدەس هاورد دۊای ئەوەگ بۊە یەکەم بازیکەر کە خەڵات پۊتاڵ زەڕین لە خول ئەمریکی ئەرا تووپان ئەرا دوو وەرز لەبانیەک بوەێدەو.

 خول ئەمریکی، دۊکە شەممە، راگەیان وە بردنەوی میسی وە خەڵاتەگە لە دۊایین رووژ لە بازیەیل وەرز ئاسایی، دۊای ئەوەگ کەفتە نوای لیست گۆڵکارەیل وە بڕ 26 گۆڵ لە ماوەی 31 بازی.

 بیتار مووسا، پەلاماردەر تيم دالاس، لە پلەی دۊەم هات وە بڕ 22 گۆڵ،  دۊای ئەویش سام سوریدج بازیکەر ناشفێل هات، کە 21 گۆڵ توومار کرد.

 میسی 29 گۆڵ لە وەرز وەرین وەدەس هاوردۊد، تا بوودە دۊەم بازیکەر لە میژوو خول ئەمریکی کە لای کەم 25 گۆڵ لە دوو وەرز لەبانیەک توومار بکەێد.

 تەمەن ئەسارە ئەرجەنتینییەگە رەسێدە 39 ساڵ، و لە وەختیگ وەرین لەی ساڵە واز لە بازیکردن ناودەوڵەتی هاوردۊد، دۊای کاروانیگ کە 21 ساڵ وەرد هەڵوژاردەی وڵاتەگەی دریژەو بۊ، وەرجە ئەوەگ گرێبەسەگەی وەرد ئینتەر میامی لە تشرین یەکەم/ ئۆکتۆبەر گوزەشتە تا ساڵ 2028 دریژەو بکەێد.

 بڕیارە پاڵاوتنەیل گەینەر ئەرا کۆتایی خول ئەمریکی لە 19 تشرین دۊەم/ نۆڤەمبەر ئیسە دەس وەپی بکەێد، دۊای ئەوەگ ئینتەر میامی وەرز ئاساییەگە لە پلەی دۊەم لەناوی بەش خوەرهەڵات  هاوردە پایان.