شەفەق نیوز/ هەنای نووڕێدە کەسیگ دیار و وەناوبانگ لە هەسارەیل، لە میدیایل دەرچوود، شایەت لەلای خوەدەو ئەو کەسە لە ژیانی خوەشحاڵە، و سەردەم خوەشیگ وەسەر بەێد، وەلی ئەوە تەنیا تووژگە، و لەو سیمایل ناو میدیایلە راسی و قویلی ژیان و گوزەرانی ئاشکرا نیە، جوور بەشیگ لەی هەسارەیلە ک خەفەت و خوسەیل ژیانیان دڵ و دەروینیان شیوانیە، تا رەسیەسە ئەوە ک تەقەلا بیەن خوەیان بکوشن.
شازادە هاری کوڕ شازادە دیانای کۆچکردگ بەریتانیا، دویای مردن داڵگی تویش رەوش خروایگ هات وەدەرەینی ناجیگرەو بوی.
شازادە دیانایش وەخود شیوەگە تویش خەفەت بویە و وەپی زانریاگە ک زیاتر لە جاریگ تەقەلای خوەیکوشتن داگە.
دواین جۆنسن یەکیگ لە دیارەیل سینەما و پاڵەوان فیلمەیل، لە قسەیگی دەربارەی تویشهاتن خەفەتباریی ئویشێد: نێزانم ئەرا هیچ دڵخوازییگم ئەرا ژیان و ئەرا هیچ چشتیگ نەمەنیە.
سیلینا گۆمیز بیجگە تووشهاتن بیماری لەشی، تویش خەفەتباری دەروینی هات، وەتایبەت دویای هاوسەرگیری کردنی وەگەرد جاستن بیبەر، ناچار بوی لە خەسەخانە بخەفێد.
لەیدی گاگا، هەسارەی هونەری گورانی جهانی، دویای ئەوە چەن جاریگ کەفتە وەر دەسدریژی سێکسی، تەقەلای خوەیکوشتن دەێد، و زیاتر لە ٥ ساڵ کەفێدە بار خەفەتباری.
خانمە ئەکتەر میسری غادە، زیاتر لە ١٨ ساڵ تویش خەفەتباری دەروینی بوود، لە دیداریگ ئاشکرا کەێد ک وەردەوام سەردان پزشکی کردگە تا نیاز خوەیکوشتن لە هویری دەرچوود.
شیرین عەبدولوەهاب، وە خود شیوەگە کەفێدە خەفەتباری دەروینی و لە کار هونەری دویرەو کەفێد، و لە دیداریگ ئاشکرای تەقەلای خوەیکوشتن کرد.
هەسارەی جهانی نیکۆل کیدمان، لە دیداریگ ئویشێد: لە یادمە لەبان شەوخەف بویم وە ناکاوەو هەس وە دڵخوەردی کردم و و تووڕە بویم و وەزوور هەناسە دام وەبی هیچ خودیگ، و تا ماوەی وەیجوورە زیان دەروینی وەخوەی دی.