کوڵە چیرووک 

ئویشن: ژنیگ ئێرلەندی وەناو مارگوری، لە ساڵ 1705 بیمار بوی و تەوی گرد، و لەو سەردەمە تەوگردن نشانەی پەتا و هەڵامەت بەد و رخدار بوی، ئەراوە هەڵەپەلە نانەی خاک، تا مەردم لەو بیمارییە تویش نان.

مارگوری، کلکوانەی گرانیگ لە کلکی بوی، شویەگەی نەتوەنست لە کلکی درارێدەی، چوینکە لاشەی مارگۆری پەنەمیاوێد.

دزەیل، لەدویرەو نووڕن، کە زانستن ژنەگە وەگەرد کلکوانەی گرانی وەخاک نریا، دی چەوەڕی کەن مەردمەگە بچنە ری، و شەو باێد، تا کار خوەیان بکەن.

شەو هات، دزەیل خاک نەرم بان تەرم مارگۆری لاوردن، و هەناێ لاشەی کەفتە دەیشت، تواستن کلکوانە لە کلکی درارن، وەلێ بیخود، کە پەنەمیاس، ئەراوە تەگبیر کردن کلک مارگۆری بووڕن.

هەگ خوین لە کلک مارگۆری دەرچگ، ژن چەوی واز کرد، و هیزخوەی دا و نیشت.

ئویشن: کەسیگ تا ئیسە نیەزانێد ئەو دزەیلە چە وەپییان هات، کە مەردمیگ وتن؛ ئەو دزەیلە لە شوین خوەیان دڵیان وسیا و مردن، و بڕیگ ئویشن؛ دزەیل لەو شوینە واین، و دی واز لە دزیکردن هاوردن.

مارگۆری لە چاڵەگە درات، و روی وەرەو ماڵ خوەی کرد.

شویەگەی مارگۆری کە پزشکە، وەرد زاڕووەیلی لەماڵ بوی، هەناێ دەنگ تەقتەق دەرکوتان هات، کە وە زاڕووەیل وت: یەک شیوەی دەرکوتان داڵگدانە.

هەناێ دەر واز کرد، و ژنەگەی لە دەر ماڵەگە دی، و خوین لە کلکی رشێد، شوی لە هەیوەتا هەر کوت و کوتپڕ کەفتە زەوی و گیانی لەدەسدا.

دی قەور شویەگە کەنیاس، چوینکە ژنەگە لەناوی دەرچگ، ئەڕاوە پیاوەگە لە ناو قەور مارگۆری ژنی نریا خاک.

رووژ هات و رووژ چگ، مارگۆری دووارە شوی کرد، و بڕیگ مناڵ هاورد.

دویای چەن ساڵیگ، مارگۆری مرد، و ئەرا قەورسان شانکیل لە لۆرگان گلەو دریا، و لەقەی قەورەگەی نویسانن: یەی گلە ژیان کرد، و دوو گلە نریا خاک.