شەفەق نیوز/ کێن ئۆم زانا و مامووسای فیزیا لە ئەمریکا، بڕیارداگە "دی ئێن ئەی" خوی کلبکەێد ئەرا بان مانگ وەو هیوایە بوونەوەرەیل ئاسمانی بتوەنن هەڵیبگرن و وکاریبارن.
وەپای خەوەریگ لە "رووسیا تودەی"، زانا ٨٦ ساڵانەگە وە نیازە وەگەرد هەفت کەستر، DNAی خوەیان ئەرا جەمسەر باشوور مانگ کلبکەن لەوەخت ئەرک ئایندەی سێلێستیسدا، کە بنکەگەی لە ویلایەت تەکساسە لە ئەمریکا.
ئۆم لە چەو وەپیکەفتنیگ وەگەرد رووژنامەی نیویۆرک تایمز باسلەوەکردیە، لە ٣٠ هەزار یان ٤٠ هەزار ساڵ ئایندە، هاتێ ئەوە بوود لە شارستانییەتیگ نوو بتوەنرێد جینات ئەو پەیابکرێد، لەری پەنجەمۆرەگەیەو.
جویر ئەوەی خوەی ئویشید، هەمیشە هیوا خوازیە جویر کەشتیوانیگ بچێدە بان مانگ، باوجی ناسا هەمیشە داواگەی رەدکردیە، چوینکە باڵای بەرزبویە کە بەرزیەگەی 188سانتیمەترە.