شەفەق نیوز- وەدویاچگن

پسپۆڕیگ لە پزیشک دەمارەیل دیاری کرد کە هەر 15 پلەیگ لە لارکردن سەر فشار لەبان مل دوو ئەوەنە کەێد، ئەرا یەیش تەمەی وەکارهاوردن موبایل زیرەک لەناو جیخەف نیەکرێد.

پزیشک ئەنتۆن تیخۆنۆڤسکی ئۊشێد: "چاشیان وەکارهاوردن موبایل زیروک لەناو جیخەف مدوو فشاریگ زیایە لەبان مل و پشت بوود، وە تایبەت ئەگەر کەسەگە ئامرازەگە بخەێدە بان زگ یا زرانی و سەری ئەرا ماوەیگ دریژ وە لاری بیلێد".

وەپەی قسەی ئەو، گونجیاگترین رەوش دانیشتن یا درازکیشانە، وەرد پاڵپشتیکردن پشت و مل وە سەرینیگ جیگیر وە گووشەیگ کە ها ناوەین 45 تا 60 پلە وە نزیکەیی.

و ئۊشێد: "نەبایەس موبایل یا ئامراز تابلێت بخریەێدە بان زگ یا زرانی، چۊنکە ئەوە سەر ناچار کەێد وەرەو نوا بچەمیەێدەو، و هەر 15 پلەیگ لە چەمیانەوە فشار لەبان بڕگەیل مل وە نزیکەیی دوو ئەوەنە کەێد، ئەرا یەیش خاستر ئەوەسە ئامێرەگە بخریەێدە بان سەرینیگ جیگیر یا هەڵگریگ تایبەت لە دویرایی 30 تا 40 سانتیمەتر لە دەمچەو، و وە نزیکەیی لەبان ئاست سینگ یا چەناگە".

پزیشکەگە دووپات کەێد، کە تەنانەت رەوش ئاسوودەیش کێشەیگ ترەک چارەسەر نیەکەێد، چۊنکە رژیان وەردەوام زانیارییەیل شایەت ئایەم لەناو رەوشیگ لە گرژی سووزداری بیلێد.

 ئۊشێدیش: "زیایچگن لە گەردین و چەوخشانن خەوەرە نەرینییەیل لەناو جیخەف نیگەرانی فرەترەو کەێد و گاڵی دەێد ئەرا دەرداین هۆرمۆنەیل گرژی، کوڕتیزۆڵ و نۆرئەدریناڵین. و لە ئەنجام یە، خەو سەختترەو بوود، و خەو بوودە خەویگ سەرزاری، و ئەگەر ئی خووە وەردەوام بوود، شایەت کەسەگە تۊش کەمخەوی بوود".