رویداوەیل فرەیگ لە ناوچەی سێسویکەی بەرمۆدا رویدانە لە باکوور زەریای ئەتڵەسی، کە بڕیگ فڕۆکە و کەشتی لەورا دیاریان نەما.

رووژنامەی دەیلی مەیل بەریتانی وت: خود کارەگە لە ناوچەی دویریگ لە ئەلاسکا بوود، کە کەفێدە ناوەین جوان و ئەنکوراج و ناوچەی بویچگ بارو، کە لە ساڵ 1970 تا ئیسە زیاتر لە 20 هەزار کەس دیاریان نەمەنیە.

دیاری کرد کە ئەو سێسویکە هەزاران گومابوین بی مدوو وەخوەی دیە، جویر دیارنەمان دوو پەرلەمانتار ئەمریکی، هیل بوگەر و نیک بیگیچ وەگەرد یاوەر و کاپتن فڕۆکەیان، لەدویای گومانیگ لە کەفتن فڕۆکەیان لە ساڵ 1972، و تا ئیسە نە پارچەیل فڕۆکەگە، نەیش تەرم و سوخان ئەو کەسیلە پەیا بویە.

 لە 3ی یولیو 2019، شانا ئومان لەتەمەن 43 ساڵان، مەوقەی سەردانکردن برادەری لە فیربانکس گوما بوی، و دەسەڵاتەیل تا چەن رووژیگ وە فڕۆکە و سەگ پۆلیسی مینەی ئەو ژنە کردن، وەلێ بیخود.

قسە وباسەیل فرەیگ لەی چەوچەی ئەڵاجەویە لە سێسویکەی ئەلاسکا کریا، کە بڕیگ باس چشتەیلیگ ئاسمانی کرد،  و بەشیگیش باس کارۆموگناتیسی ئەو ناوچە کرد.

دەیلی مەیل وت: لەناو خەڵک ناوچەگە باس ئەفسانەیگ کریەێد جویر ئەو دەیدامە وەناو «ساکواچ» کە مەردم کوشێد.

وەگورەی گوڤار "World Population Review"، هەرچەن تەنیا 1 لەسەد ئەو ناوچە مەردم ها ناوی، باوجی ئەلاسکا گەورەترین شمارەی کەسەیلیگ لەناوی بیسەروشوین بوون.