کەسەیلیگتر ئی شمارە شکاننە، ک رۆبرت مەکدۆناڵدس لە ساڵ ١٩٨٦، تا ١٨ رووژ و نزیکەی ٢٢ ساعەت خەو نەکرد، وەلی نەخەفتن گاردنەر لەژیر چەو پزشک بوی.

کتاو گینیس واز هاوردیە لە توومارکردن ئی کارە، ک لە ساڵ ١٩٩٧، داوای شمارەی پەیمانەیی لە نەخەفتن وەنەگرد، چوینکە رخ گەورەیگ لە بیخەوی هەس.

ئایا چ بی خەوی چ رخیگ لەبان لەش دیرێد؟ 

خەو گرنگە ئەرا کارەیل جیوەجیکردن و هەسکردن لەش، و هاتێ ئەگەر کەسیگ بەش خوەی نەخەفێد رخ تویشهاتن وە بیماریەیل فرەیگ کەفێدە بانی، جویر شەکرە و دڵ و چاخی و دڵتەنگی.

 پسپۆڕەیل ئویشن: ئایەم هەر ٢٤ ساعەتیگ لە ٦ تا ٨ ساعەت خەو لە خود مەوقەگە خوازێد، ک دکتۆر ئۆرین کوهین پزشک خەفتن لە خەسەخانەی ماونت سینای لە نیویۆرک ئویشێد: بی بەشی لە خەفتن هاتێ بڕەسێدە ئاستیگ ک دی نیەزانێ کامە خەفتنە و کامە ئاگاییە.

ئویشێدیش: هەناێ کەسیگ تا ماوەی ٢٤ ساعەت وەخەوەر بوود، مەغزی کەفێدە ناوبەین خەفتن و ئاگایی، هەرچەن ک دیارە کابرا نەخەفتگە، ئەوەیش وەپی ئویشن نیمچە خەویگ.

دکتۆر ئەلون ئەفیدان وەڕیەوبەر ناوەند شیواشیو خەفتن لە زانکۆی کالیفۆرنیا لە لۆس ئانجلەس ئویشێد: ئەو کەسەیلە ک ئەرا چەن ساعەتیگ نیەخەفن، وەپیان دیار هانە خەوەر، باوجی مەغزیان چوودە ناو خەفتن نا سرووشتی، ک هیلێد کەسەگە هووشی وەخوەی نەمینێد، و قسەی جویر وڕینە بکەێد.