گادیوا ژن دوک کاونتری بۊ ؛
خانزاێەێگ فرە قنج و ڕەنگین و شیرپاک .
ئی ژنە نیشانەێ ڕەنگینی و پاکداوێنی لە وڵات ئنگلیس بۊ ک گشت خەڵک دووسێ داشتن .
گادیوا ک ستەم و زوور شۊەگەێ وە وڵات دی و خەراجات قورسێگ ک وە مەردم سەنیاد و سییەچارەیی ک ڕشانۊە مل خەڵک؛ چوودە لاێ شۊەگەێ و داوا کەێد تا وە ئی کارەیلە هەڵگەردێدەو و زوور وە مەردمان نارێد و وە ئی خەراجات سەنگینە دەس بکیشێدن .
ئەمان دوک کاونتری گووش نەێا و ئاخرکار ک لاڵکیان گادیوا کیشادە گیرە کردن ؛ دوکیش ک زانستیا ژنەگەێ چەنێ وە نجابەت و پاکی باوەڕ دێرێ ئەڕاێ دەسپێچگ هاوردن وەگەردێ شەرت کرد ک ئەگەر ڕۊتەو بوود و دەورتادەور شارەگە وە ڕۊتی بگەردێد، خەراجات بوودە ئەوە ک گادیوا بۊشێدن .
گادیوایش ک دڵێ ئەڕاێ نەداری و زوڵمێگ ک وە مەردم چیا سزیاد ، وە مەرجەگەێ دوک رازی بۊ.
ئی خەوەرە وە گشت شار پیچیا و قەرار بۊ که دو ڕووژتر ئی کارە بکریەێد .
ڕووژ دیاری کریاێ ڕەسی و گادیوا لە حاڵێگ ک قژ زەڕینەگەێ خستۊە مل ئەنامێ، سوار ئەسبێگ بۊ و وە قەسر دا دەیشت.
ئەمان ئەو ڕووژە وە حورمەت ئی گەورا ژنە هۊچکەس ناهاتە ناو شار و وە هۊچ مەێدانێگ کەسێ دیار نەۊ و هۊچ دەروەچ و دەرێگ وا نەکریا و گشت ک زانستۊن گادیوا ئەڕاێ مەردم ئی کار گرانە کەێدن ، ناو شار و دەیشت چووڵ کردن و هەر نیشتنە ناو ماڵەیلیان .
ئیمڕوو ناو گادیوا بۊەسە نیشانەێ یەێ ژن ئازادە و مەردمدار لە پێشینەێ ئنگلستان و ئی مەتەڵە هەر مەنێە و بۊەسە بوونەێ ئاسەوار وینەکیشەیل و کوتەڵسازەیل فرەێگ .