هەڵبەتە ئەڵگەردان تەواو ناونشان کتاوەگە وەیجویرە بوود (پرسیارەیل گەورەیگ لە کەسەیلیگ بویچگ و وەڵامەیل ئاسانیگ لە مەغزەیل مەزن)، وەلێ ئەرا ئەوە کە ئەڵگەردان واتە گرنگترە لە ئەڵگەردان واژە، بویەسە ئەو ناونشانە کە لە بانەو نویساس.

جێما ئێلوین هاریس خاوەن کار ماوە درویژە لە بڵاوکردن لە لایەن سەرنویسەری و گوڤار، لە رووژنامەیل تایم ئاوت و گلامۆر و  سەندەی تایمز کار کردیە.

ئەو هویر کتاوەگەی کردیە دویای ئەوە کە کەفتە وەر زوور پرسیار کوڕ و خوشکەزایلی.

جێما هاوبەش وەگەرد NSPCC/Childline کردیە کە یەکیگە لە گەورەترین ریخریاگ خێرخوازیەیل مناڵەیل لە بەریتانیا، داهات کتاوەگەیش چوود ئەرا پاڵپشتیکردن کارە وەنرخەیل ریخریایەگە.

لەناو کتاوەگە کە پرسیار و وەڵامەیل نویسیایە، بڕیگ لە پسپۆڕەیل وەڵام ئەو پرسیارەیلە دەن،  کە هەمیشە مناڵەیل ئەو پرسیارەیلە کەن، و گەورەیلیش فرەجار دەسپاچە مینن، کە نیزانن جواویان بیەن، و لەیرا چەن نموونەیگ لەو پرسیار و وەڵامەیلە بڵاو کەیمن، کە ئاژانس شەفەق نیوز ئەڵگەردانیان کردیە.

• ئایا ئاژەڵەیلیگ هەس هیمان ئایەم ئاشکرایان نەکردیە؟

وەڵامەگە لە سێر دەیڤید ئاتینبارا - زانا و پیشکەشکار بەڵگەفیلم سروشتی

• بەڵی، بیگومان، و شایەت هەزاران، وەلێ شمارەگە چەنیگە، وەڕاسی هیمان کەسیگ نیەزانێد.

ئەگەر رووژیگ لە ناو دارسان وارانی بوید، و تووڕیگ جویلانید تا پەپوولە بگرید، لە دەور درەختەیل یا لەبان وەڵنگەیل ژیر سای دارەیل، بیگومان سەدان مەلوموور لەورا گردەو بوود، ئایا گشتیان لەلای زانست ئاژەڵ ناسیانە؟، هەڵبەت ئەگەر لە زانای خشیەیل بپرسید، شایەت ئەویش گشتیان نەناسێد.

بیگومان ئیمە هیمان نیەزانیمن چ دەیدامەیلیگ لە قویلی دەریا هەس، چوینکە ئایەم تا گشت قویلیەگە نەڕەسیە.

• ئەڕا چە موسیقا دیریمن؟

وەڵامەگە لەلایەن گارفیس کۆکەر- گورانیچڕ و ئاوازنویس

• يە پرسیار فرە خاسیگە، کاشکا جواوەگەی بزانستیام (هەنەکی کەم)، بەڵی، راسه ئەگەر مۆسیقا لە جەهان نەمینێد، کەسیگ نیەمرێد، چوینکە هەکاتی ئاو و وا نییە، تا وەبی ئەوە ژیان نەکەیمن، وەلێ هویریگ لەلی بکە، ئەگەر مۆسیقا نەمینێد ئی ژیانە تامی چە بوود، ئاهەنگەیل مۆسیقایی لەکار وسیەن، و میۆزکژەنەیل بوونە چەن کەسیک لەبان شانۆ، و ئیمەیش بڕ فرەیگ لە مەردم هەر وەپیان نووڕیمن، کە ئەوانیش کڕ وکپ، وەبی دەنگ وسیانە، و هویچ دەنگیگ نییە.

وەلێ بڕوا بکە، هویچ مەردمیگ لەبان زەوی نییە کە مۆسیقا نەیاشتوون، لە ڕاسیەو، بەشیگ لە زانایل ئویشن ئایەمەیل جارانی گورانی چڕینە و مۆسیقا دروس کردنە وەرجەیەگ قسەیش بزانن.

هاتێ مۆسیقا یەکەمین شیوەی پەیوەندیکردن بویە، کە ئیرنگە توەنید وەبی واژە لە مۆسیقای جەهان بڕەسێدەو، ئەرا نموونە، گووش لە گورانیەیل دڵخوەشی و دڵتەنگی بگر، لە هەر زوانیگ بوود، کە توو زوان ئەو مەردمە نیەزانید، وەلێ لە مۆسیقاگەی رەسێدەو.

• ئەڕا چە مەیموون خوەشی لە مۆز تیەێد؟

وەڵامەگە لەلایەن دانیال سیموندز- پاسەوان باخچەی ئاژەڵەیل لەندەن

• مەیموون چشتەیلیگ جویراجویر خوەێد، میوە و سەوزە و گەڵای دارەیل، وەلێ خوەشیان تیەێد لە مۆز چوینکە تامدار و شیرینە.

مەیموون خوازێد وەزویترین وەخت بخوەێد، وەرجەیەگ ئەو مەیموونەیل وەپی بزانن ئمجا بانە مۆزەگە لەدەسی بقەپنن.

چوینکە مۆز وە ئاسانی تووکی کریەێد، و وەئاسانی قویتا دریەێد، ئەراوە مەیموون خوەشی لەلی تیەێد، بیجگە تامداریی و شیرینیی، لەوەر ئەوە کە وەزوی خوریەێد، وەرجەیەگ مەیموونیگ ترەک لەلی بوەێدەی.

بەشیگ لە مەیموونەیل هەس، تووک مۆزەگە گرنەو، و بەشیگیش هەر وەتووکەو خوەنەی، و بەشیگ ترەک هەس، مۆزەگە پیچ دەێد، و ناوەگەی دەرکەێد، ئیجا خوەێدەی.