شەفەق نیوز/ هەنای بڕیگ لە کەسەیلە کەفنە نزیک مەرگ و گلەو خوەن، ئۊشن ک ژیانیان جۊر فیلمیگ تیەێدە وەرچەویان، و ئی کارە نزیکە لە راسی، وەگورەی زانایلیگ.    

زانایلە، ئەرا یەکەم جارە، تۊنستن ئەو گورجیە لە مەغز ئایم لە مەوقەی مردنیان بوود توومار بکەن.    

وەگورەی سایت ئەتڵەس نیوز، ئی توومارکردنە دەسمیەتی لە نووڕستن شەپۆل مەغز دا ک وەرپرسە لە چەن کاریگ جۊر خەون و یادکردن.   

زانایلە داشتن نووڕستیانە شەپۆل مەغز پیاویگ لە تەمەن ٨٧ ساڵ، و تۊش بیماری پەرکەم هاتگە، و لەناکاوەو پیاوەگە تۊش نۆبەدڵ هات، ئیجا دڵی وسیا، ک هیشت زانایلە ١٥ خوەلەک لە گورجی مەغزی لە مەوقەی مردنی توومار بکەن. 

وەگەرد ٣٠ چرکە لە وسیان دڵی، نووڕستنە زیایبۊنیگ لە شەپۆلەیل مەغزی، ک وەپی ئۊشن "شەپۆل گاما".   

ئەجمەل زیمار ک سەرپەرشتیاری ئەو توێژینەوە کەێد وت: هەنای ئی شەپۆل گاما گورجەو بوود، تا هۊرمان یادەیلە بارێدەو، مەغز ئایەم زاقترین ویستگەیل ژیان وەرجە مردن گلەو دەێد،  و یەیشە مینێدە ئەو باسەیلە ک مردمیگ باسی کردنە کەفتنەسە نزیک مەرگ.