شەفەق نیوز/ لە کار ئەڵاجەوییگ و دەگمەن، خەڵک ئاواییگ هندی پرسە و چەمەری گەورەیگ ئەرا ما تیمساحیگ کردن، ک یە زیاتر لە ٧٥ ساڵە ئەو تیمساحە پەرەسن.

نمازخوەنەیل لەناو پەرستگایگ لە وڵات هندستان پرسەی ما تیمساحیگ کردن، لەناو دەریاچەیگ نزیک ئەوزەڵ کردیە، و تەنیا گیاخوەر بویە، و برنج لە دەس خەڵکەگە خواردیاد.

تەرم تیمساحەگە، ک وەناو "بابیا" ناسریاگە، وە چەپکە گوڵ هەلڕازیا، ئیجا نریا ناو تابووتیگ شویشە، تا نمازخونەیل لە ئاوای ئەنانسابورا لە ویلایەت کیرالا بتوەنن دویاترین نووڕین لەلی بکەن.

"بابیا" ئەرا دەیان ساڵ لەبان پاچینەیل پەرستگای "سری ئەنانسابورا" خوەی دیادە خوەرەتاوی، ئیجا لەو برنج و خوەراک درەختیە لەوەڕیاد ک خەڵگە ئەرای پیشکەشی کەن، و شەوانە، هەنای نماز مەردمەگە تەواو بوود، بابیا لەناو پەرستاگە گەردیاد.

بابیا، لەلای خەڵک ئاوایەگە پەیوەندی وە ئەفسانەیگ دیرێد، ک خەلکەگە ئویشن: دویای ئەوەگ ئەفسەریگ لە داگیکەرەیل بەریتانیا لە ساڵ ١٩٤٥ گولە لە تیمساحیگ لەناو گوڵەمیگ وەشان، ئەو تیمساحە گیاخوەرە پەیا بویە، دی هیندۆسەیل دەسکردنە پەرەسیی.

وەلێ پسپۆڕەیل ئویشن ئەو تیمساحە گیاخوەر نییە، باوجی دەریاچەگە پڕە لە ماسی و مار، ئەراوە پەلامار تیمساح پەرەسەیل نەیا، چوینکە هەمیشە تییر بویە.