شەفەق نیوز/ دیزاینەر دڵنگ سویری شازادە دیانا کۆپیگ دڵنگەگە وەناوبانگەگە نمایشکرد کە شازادەی کووچکردگ شازادە دیانا مەوەقەی سویرەگەی وەرد شا چارلز لە ساڵ 1981 پوشیەسێ.
وەپای ماڵپەڕ "people" ئەو دڵنگە سویرە کۆپیگ یەدەگ بویە ئەو وەخە ئەرا خوەیپارێزی دیزاین کریاگە ئەرا بارودۆخ نەخوازریاگ و پیشبینی نەکریاگ کە هاتێ لە ئاهەنگ سویر روی بدەێد.
دیزاینەری دڵنگ سویرەگە ئەلیزابێس ئیمانوێل، ئوشێد " کەمێک ترسیام، هویرەو لەوە ئەکردم چە روی دەێد ئەگەر کەسیگ بچێدە ناو و دڵنگەگە بدزێد یان چشتیگ وەپی بڕشنێد، لەوەر یە هویرەو لە دیزاین پرتال یەدەگ کردم ئیلهامەگەی لەو پرتال پەمەییە وەرگردم کە ئەرا دیانا دویری بویم تا چەن رووژیگ وەرجە ئاهەنگەگەی بپوشدێ.
ئەلیزابیس باس لەوە کردیە دڵنگە یەدەگەگە فرە جیاواز بویە وەرد ئەو دڵنگە وەناوبانگەی شازادە دیانا لە رووژ سویرەگەی پووشیبوی، و دیزاینەرەگە باس لەوە کردیە دڵنگە یەدەگەگە نوێژەن کردیە ئەرا نمایشکردنی لە مۆزەخانەی شازادە دیانا.