ژینگ تەنیا کوڕیگ داشت، دڵیان وەیەک خوەش بوی، تا رووژیگ هات، کوڕەگە وەناکاوەو مرد.

داڵگ سەبر و ئارام ئەرای نەمەن، و هەرچەگ کرد هچانیگ لە خەفەت و گیریە وەدەسی نەکەفت.

پیای دانایگ لەناو ئاوایەگە هەس، ژنیش لە هەیوەت ژان دڵی چگ داد لە دەر پیای دانا، و پەڵپ لەلی گرد کاریگ بکەێد کوڕەگەی گلەو بەێد.

پیای دانا هەناسەی قویلیگ کیشا، و وەژن وت: تا بتوەنم کاریگ بکەم کوڕەگەد باێدەو، یەی دان گەنم خوازم لە ماڵیگ بارێدەی قەت خوسە و خەفەت لەناوی نەویە.

ژنیگ هەگ یە زنەفت کوتپڕ هەڵسا پا، و چگە مینەی دان گەنم لە ماڵەیل ئاواییەگە.

یەی دەر کوتا، ژنیگ گەنج دەر واز کرد، یەیش لەلی پرسی، ئایا ئی ماڵە خوسە و خەفەت وەخوەی دییە؟

خاوەن ماڵ زەردە خەنەیگ کرد، و وت: ئمجا ماڵ منە لە خوسە زیاتر چە دییە؟

مکیس ژن کرد باێدە ناو تا ئەرای باس بکەێد، و ئەرای باس مردن شویەگەی کرد کە چوار دویەت و کوڕ هیشتیەسە ملی، و ناچار بویە ناوماڵە بفرووشێد تا تیکە نان مناڵەیل بسینێد.

ژن کوڕ مردگ، خوو دادە ژن شوی مردگ، و دەسکردنە باس و قسە. 

ژنەگە لەو ماڵە دەرچگ، دی بویە نزیک خوەراوا، چگە ماڵیگ ترەک، هەمیش لە خاوەنی پرسی ئایا ئی ماڵە خوسە و خەفەت وەخوەی دیە؟

ژن ئی ماڵەگەی ترەک، شویەگەی کڵووڵەس کەفتیەسە تو جی، و نانیگ نەیرن بخوەن.

ژن کوڕ مردگ، هەگ یە زنەفت، چگە بازاڕ ئەوەگ داشت خەرج چشتەیلیگ ئەرا ئی ماڵ بەدبەختە کرد، و هاتە ماڵەگە نیشتە دروسکردن ئاش و خوەراک.

ئی رووژەگە، هەرلە شەوەکی، ژن دەسکردە کوتیان دەر ماڵەیل، ئەرا یەی دەنگە گەنمیگ، لە ماڵیگ خوسە وەخوەی نەییە، وەلێ وەداخەو، هویچ ماڵیگ بی خوسە و خەفەت نەوی، و یەیش چوودە هەر ماڵیگ گووش لە باسەیل خوسە و دویدمانیان گرێد، و تەقەلایش دەێد دەسمیەتییان بەێد.

چەن رووژیگ وەپی چگ، ژن کوڕ مردگ، واز لە دان گەنم هاورد، چوینکە ماڵیگ بی خوسە نییە، وەلێ هەمیش چیادە ئەو ماڵەیلە، و دەسمیەتی ئیەکە و ئوەکە دیاد.