شەفەق نیوز/ لە تاوانیگ نشان نەمان هەس داڵگی دەێد، دەسەڵاتەیل داگستان لە رووسیا، ژنیگ دەسگیر کردن ک کوورپەی ٥ رووژەی خوەی فرووشتیە، و خوازیە وەو پویلە نەشتەرگەری جوانکاری ئەرا لویت خوەی بکەێد. 

ئەو ژنە لە تەمەن ٣٣ ساڵان، ک ناوی ئاشکرا نەکریا، داوالە ژنە هاوساگەی کردیە، ک خوازێد کوورپەگەی بفرووشێد، دویای چەن رووژیگ لە زایینی، تا بسینیگ ئەرای پەیا بکەێد.   

ژنە هاوساگە، ژن وشوییگ بسین پەیا کرد، وداڵگەگە کوورپەگەی وە ٢٧٤ جنێە ئیستەرلینی وەپیان فرووشتیە، ودویای ئەوە هەناێ کوورپەگە بیمار بویە، ژن وشویەگە داوای بڕوانامەی زایینی کردیە، باوجی داڵگەگە داوای ١٣٧٠ جنێە ئیستەرلینی کردیە تا بڕوانامەگە وەپیان بیەێد. 

وەگورەی رووژنامەی  "میرۆر" بەریتانی؛ داڵگەگە وەو ژن وشویە وتیە گوایە خوەی بیکار و بیشوینە، وهویچ پویلیگ نەیرێد، ولێ دویای ئەوە وتیە ئەو پویلە خوازێد تا خەرج نەشتەرگەری جوانکاری ئەرا لویتی بکەێد.   

ژنەگە وتییشە، گوایە "لویت نوویگ" خوازێد تا هەناس خاستر بکیشێد، باوجی وەرجەیەگ ئەو بڕە پویلەگە بکەفێدە دەسی، پۆلیس وە توومەت بازرگانیکردن وە ئایەم دەسگیری کرد.