شەفەق نیوز- وەدویاچگن

بازیکەر تیم نیشتیمانی عراقی تایکواندۆ، ئیناس عەتا، رەسیە کۆریای باشوور ئەرا بەشداریکردن لە پێشبڕکێیەیل پاڵەوانیەتی جیهانی تایکواندۆ - بۆمسی، کە لە شار چێنتچوون کۆریای باشوور وەڕێوە چوود و پێشبڕکەیل تا 20ی ئەیلول وەردەوام بوون.

ئەحمەد غەراوی، وەڕێوەبەر ئۆفیس راگەیانن یەکێتی ئێ وەرزشە، وە شەفەق نیوزی وت؛ پاڵەوانیەتییەگە وە بەشدارییگ فراوان لە وڵاتەیل جوراوجویر جیهان وەڕێوەچوود، وە بەشداریی 83 وڵات و زیاتر لە 2700 بازیکەر ژن و پیای، لە یەکیگ لە دیارترین بەشدارییە جیهانییەیل وەرزش تایکواندۆ.

وتیش؛ یەکێتی عراق پشت وە بەشداریی ئیناس عەتا بەسێد ئەرا پێشکەشکردن ئاستیگ هونەریی جیاواز و نوێنەرایەتیکردن عراق وە شێوەیگ شایستە، لە ناو پێشبڕکێیگ قایم کە کۆمەڵیگ لە خاسترین بازیکەرەیل بۆمسی لە ئاست جیهان گردەوکەێد.

ئاشکرایکرد، بەشداریکردناگە وە رووشنایی ئەنجام خانمە بازیکەرەگە و توانایەیل بەرزی هات لە بەشداریکردنەیل اوخوەیی و بەرزەوبوین ئەرا پلەی یەکەم.