مێژوو جەژن کراکارەیل چوودەو ئەرا یەک ئایار 1886 لە شیکاگ دویایش لە تۆرینتۆ کراکارەیل خوەنیشاندان کردن لە ژیر دروشم  (ھەشت ساعەت كاركردن) ( ھەشت ساعەت ئەرا خەفتن ) (ھەشت ساعەت هچان) ئەنجام دان.

ئی داواکاریی کراکارەیل، دەسڵاتدارەیل و خاوەنکارەیل نیگەرانکرد، وەی هووکارە هێزەیل ئاسایش دەسدرویژی لە خوەنیشاندەرەیل کردن، ک شمارەیگ لەلیان کوشیان و چوار سەرکردەی خوەنیشاندانەیل سزای لە سێدارەدان ئەرایان دەرکریا.

گرۆفێر كلیفلاند سەرۆك ئەو وەختەی وڵاتە یەكگرتگەیل ئەمریكا وەگەرد پارت کراکارەیل رێککەفت رووژ کراکارەیل دیاریبکریەد.

لە ساڵ 1904 لە كۆنفڕانس ناودەوڵەتی سۆسیالیست ئەمستێردام لە هۆڵەندا، كۆمەڵە و سەندیكای کراکارەیل و سۆسیالیستییەگان خوازیار وەرگردن هچان و كارنەكردن بوین لەو رووژە.

لەساڵ 1958 لە كۆنگرێس وڵاتە یەکگرتگەیل ئەمریكا بڕیاردریا رووژ یەك ئایار گشت ساڵیگ بکریەدە هچان فەڕمی و جەژن کراکارەیل.